පොදු රාජ්‍ය මණ්ඩලීය ක්‍රිකට් ඉසව්වට සුදුසුකම් ලැබූ රටවල් ප්‍රකාශ කෙරේ – ශ්‍රී ලංකාව අසමත්
2022 වසරේ බර්මිංහැම්හිදී පැවැත්වීම නියමිත පොදු රාජ්‍ය මණ්ඩලීය ක්‍රීඩා උළෙලේ ක්‍රිකට් තරග ඉසව්ව සදහා සුදුසුකම් ලබා ගත් රටවල් ජගත් ක්‍රිකට් කවුන්සලය සහ පොදු රාජ්‍ය මණ්ඩලීය ක්‍රීඩා සම්මේලනය අද(26) ප්‍රකාශයට කළා.
සත්කාරක එංගලන්තය සමගින් ක්‍රීඩා උළෙලේ ක්‍රිකට් ඉසව්වට එක්වන සමස්ත රටවල් සංඛ්‍යාව 8ක්.
පොදු රාජ්‍ය මණ්ඩලීය ක්‍රීඩා උළෙලක් සදහා ක්‍රිකට් ක්‍රීඩාව මෙලෙස ඇතුළත් වන්නේ ඉතිහාසයේ දෙවැනි වරට වීම විශේෂත්වයක්.
පළමු වරට 1998 වසරේ දී පිරිමි කණ්ඩායම් පමණක් සහභාගී කර ගනිමින් එක්දින තරග ඉසව්වක් ලෙස ක්‍රිකට් ක්‍රීඩාව පොදු රාජ්‍ය මණ්ඩලීය ක්‍රීඩා උළෙල සදහා ඇතුළත් කර තිබූ අතර, එහි ජය වාර්තා කළේ දකුණු අප්‍රිකාවයි.
මෙවර කාන්තා පන්දුවාර 20යි 20 තරග ඉසව්වක් පමණක් ක්‍රීඩා උළෙලට ඇතුළත් කිරීමටයි පියවර ගෙන ඇත්තේ.
ජගත් ක්‍රිකට් කවුන්සලය අද නිවේදනය කළේ සත්කාරක එංගලන්තය, ඔස්ට්‍රේලියාව, නවසීලන්තය, ඉන්දියාව, පාකිස්තානය, දකුණු අප්‍රිකාව සහ බටහිර ඉන්දීය කොදෙව් දූපත්වලින් එක් රටක් ක්‍රීඩා උළෙල සදහා මේ වන විට සුදුසුකම් ලබා ඇති බවයි.
පසුගිය පළමු වැනිදා (අප්‍රේල් 1) වන විට අයි.සී.සී කාන්තා පන්දුවාර 20යි 20 ශ්‍රේණිගත කිරීම්වලට අනුව සත්කාරක එංගලන්තය හැර (සත්කාරක රට බැවින්) ඉදිරියෙන්ම සිටින සෙසු කණ්ඩායම් හයයි මෙලෙස ක්‍රීඩා උළෙල සදහා සෘජුවම සුදුසුකම් ලබා ඇත්තේ.
ශ්‍රී ලංකා කාන්තා කණ්ඩායම ශ්‍රේණිගත කිරීම්හි 8 වන ස්ථානයේ පසුවන බැවින් ඔවුන් ඒ සදහා සෘජුව සුදුසුකම් ලබා ගෙන නැහැ.
ක්‍රීඩා උළෙලට එක්වන අවසන් කණ්ඩායම තෝරා ගැනීම සදහා සුදුසුකම් ලැබීමේ තරගාවලියක් සංවිධාන කෙරෙන අතර, ඉන් ජය ගන්නා කණ්ඩායමට පොදු රාජ්‍ය මණ්ඩලීය ක්‍රීඩා උළෙලේ ක්‍රිකට් ඉසව්ව සදහා එක්වීමේ අවස්ථාව හිමි වනවා.
ඒ අනුව එම සුදුසුකම් ලැබීමේ තරගාවලිය ජය ගතහොත් පමණක් ශ්‍රී ලංකා කාන්තා කණ්ඩායමට ලබන වසරේ පැවැත්වෙන පොදු රාජ්‍ය මණ්ඩලීය ක්‍රීඩා උළෙල සදහා ක්‍රීඩා කිරීමේ අවස්ථාව හිමි වනු ඇති.
මේ අතර, ක්‍රීඩා උළෙල සදහා බටහිර ඉන්දීය කොදෙව්වන් සුදුසුකම් ලබා ගෙන ඇති බැවින් තවත් සුදුසුකම් ලැබීමේ තරගාවලියක් ද පැවැත්වීමට සිදුව තිබෙනවා.
ඒ, කැරිබියානු දූපත් අතරින් කුමන රටක් අදාළ තරගාවලියට ක්‍රීඩා කරන්නේ ද යන්න තෝරා ගැනීම සදහායි.
ක්‍රිකට් තරග සදහා කැරිබියානු දූපත් රාජ්‍යයන් ඒකාබද්ධ වී බටහිර ඉන්දීය කොදෙව්වන් ලෙස තරග කළ ද, පොදු රාජ්‍ය මණ්ඩලීය ක්‍රීඩා උළෙල සදහා කැරිබියානු දූපත්හි ක්‍රීඩක ක්‍රීඩිකාවන් තරග වදින්නේ වෙන වෙනම රටවල් වශයෙන්.
එබැවින් එම කැරිබියානු දූපත් රාජ්‍යයන් අතර පවත්වන සුදුසුකම් ලැබීමේ තරගාවලියකින් ජය ගන්නා රටට බටහිර ඉන්දීය කොදෙව්වන් වෙනුවට පොදුරාජ්‍ය මණ්ඩලීය ක්‍රීඩා උළෙල නියෝජනය කිරීමේ අවස්ථාව උදා වනු ඇති.
2022 පොදු රාජ්‍ය මණ්ඩලීය ක්‍රීඩා උළෙල ලබන වසරේ ජූලි 28 වනදා සිට අගෝස්තු 8 වනදා දක්වා පැවැත්වීමට නියමිතයි.