එංගලන්ත ප්‍රබල වේග පන්දු යවන්නා ටෙස්ට් තරගාවලියෙන් ඉවතට – ආදේශක ක්‍රීඩකයෙකුත් නම් කෙරේ
එංගලන්ත වේග පන්දු යවන ක්‍රීඩක මාර්ක් වුඩ්ට ශ්‍රී ලංකාව සමග පැවැත්වෙන ටෙස්ට් ක්‍රිකට් තරගාවලියේ අවසන් තරග දෙක ක්‍රීඩා කිරීමේ අවස්ථාව අහිමි වී තිබෙනවා.
ඒ, දෙරට අතර මැන්චෙස්ටර්හී දී පැවැති පළමු ටෙස්ට් තරගයේ තෙවැනි දිනයේ දී ඔහු මුහුණ දුන් පාදයක ආබාධයක් (thigh injury) හේතුවෙන්.
ආබාධය නිසා මාර්ක් වුඩ්ට තරගයේ සිව්වැනි දිනයේ දී පන්දු යැවීමට ද නොහැකි වුණා.
ඔහු වෙනුවට මෙතෙක් ජාත්‍යන්තර වරම් දිනා නොමැති 20 හැවිරිදි වමත් වේග පන්දු යවන ක්‍රීඩක Josh Hull සංචිතයට කැදවීමටයි පියවර ගෙන ඇත්තේ.
මාර්ක් වුඩ්ට ඉතිරි ගිම්හාන ටෙස්ට් තරග වාරයම අහිමි වී ඇතත්, ඔහුට ඔක්තෝබර් මාසයේ දී එංගලන්ත කණ්ඩායම සිදු කිරීමට නියමිත පාකිස්තාන තරග සංචාරය සදහා ක්‍රීඩා කිරීමට හැකි වනු ඇති බවට අපේක්ෂා කෙරෙනවා.
වේග පන්දු යවන ක්‍රීඩක ඔලී ස්ටෝන් ද ශ්‍රී ලංකාවට එරෙහි ටෙස්ට් සංචිතයේ රැදී සිටින බැවින් එළඹෙන 29 වැනිදා ලෝඩ්ස් ක්‍රීඩාංගනයේ දී ආරම්භ වීමට නියමිත දෙවැනි ටෙස්ට් තරගය සදහා මාර්ක් වුඩ් වෙනුවට ඔහුව කණ්ඩායමට කැදවීමට ඉඩ තිබෙනවා.
6ft 7in 📈
Left-Arm Fast 🚀
Introducing, Josh Hull!
🏴 #ENGvSL 🇱🇰 #EnglandCricket pic.twitter.com/3p0CpsFhp9— England Cricket (@englandcricket) August 25, 2024