ඇබෙල් වෙනුවට ජැක්ස් කැදවයි

බංග්ලාදේශය සමග පැවැත්වීමට නියමිත තරග 3 කින් යුත් එක්දින ක්‍රිකට් තරගාවලිය සදහා වන එංගලන්ත සංචිතයට විල් ජැක්ස් ආදේශ කර තිබෙනවා.

ආබාධයකට ලක් වූ ටොම් ඇබෙල් වෙනුවටයි මෙම ආදේශ කිරීම සිදු කර ඇත්තේ.

විල් ජැක්ස් මෙතෙක් එංගලන්ත ටෙස්ට් සංචිතය සමග නවසීලන්තයේ රැදී සිටි අතර, ඒ අනුව ඔහු අද (25) දිනයේ දී බංග්ලාදේශය වෙත පැමිණීමට නියමිතයි.

එංගලන්ත සීමිත පන්දුවාර සංචිතයේ සෙසු ක්‍රීඩකයින් ඊයේ (24) දිනයේ දී ඩකා නුවර වෙත ළගා වුණා.

එංගලන්ත ලයන්ස් කණ්ඩායම නියෝජනය කරමින් ටොම් ඇබෙල් පසුගියදා නිමා වූ ශ්‍රී ලංකා සංචාරයට එක්ව සිටි අතර, එම තරග සංචාරය අතුරතුර දී යි ඔහු ආබාධයකට ලක් වුණේ.

බංග්ලාදේශ – එංගලන්ත එක්දින තරගාවලිය ලබන පළමු වැනිදා ඩකා හී දී ආරම්භ වීමට නියමිතයි. දෙවැනි එක්දින තරගය මාර්තු 3 වැනිදාත්, තෙවැනි එක්දින තරගය මාර්තු 6 වැනිදාත් පැවැත්වීමට නියමිතව තිබෙනවා.

අනතුරුව දෙරට අතර 20යි 20 තරගාවලිය පැවැත්වෙන්නේ මාර්තු 9, 12 හා 14 යන දිනවලදීයි.