ඉන්දියාවට 3-0 ක ඓතිහාසික පූර්ණ ටෙස්ට් තරගාවලි පරාජයක් – පරාජය ඉතිහාසගත වුණේ මෙහෙමයි
Match Report
සංචාරක නවසීලන්ත කණ්ඩායම සමග පැවැති තෙවැනි හා අවසන් ටෙස්ට් ක්‍රිකට් තරගයෙන් ද ලකුණු 25 ක පරාජයක් වාර්තා කරමින් තරග 3-0 ක ඓතිහාසික පූර්ණ ටෙස්ට් තරගාවලි පරාජයක් ලැබීමට ඉන්දීය කණ්ඩායමට අද(3) සිදු වුණා.
ඉන්දීය කණ්ඩායම ඉන්දියාවේ දී මෙලෙස පූර්ණ ටෙස්ට් තරගාවලි පරාජයක් ලැබුවේ 2000 වසරෙන් පසුව පළමු වරට වීම විශේෂත්වයක්. එමෙන්ම ටෙස්ට් තරග 3ක් හෝ ඊට වැඩි තරග සංඛ්‍යාවක් සහිත ටෙස්ට් තරගාවලියක් සිය රටේදී පූර්ණ ලෙස ඉන්දියාව පරාජයට පත් වූ පළමු අවස්ථාව මෙයයි.
මුම්බායිහි වන්කඩේ ක්‍රීඩාංගනයේ පැවැති තරගයේ තෙවැනි දිනය වූ අද දිනය ආරම්භ කරන විට සිය දෙවැනි ඉනිම ක්‍රීඩා කරමින් සිටි නවසීලන්තය කඩුලු 9ක් දැවී ලකුණු 171 ක් ලබා සිටි අතර, ඔවුන්ගේ සියලු දෙනා ලකුණු 174 කට සීමා වුණා.
ඒ අනුව අවසන් ටෙස්ට් තරගය ජය ගැනීම සදහා ඉන්දියාවට ලකුණු 147 ජයග්‍රාහී ඉලක්කයක් හිමි වූ නමුත්, ඉන්දියාවට සියලු දෙනා දැවී ලබා ගත හැකි වූයේ ලකුණු 121 ක් පමණයි. ඉන්දීය ඉනිමේ අවසන් කඩුලු තුන පන්දු 4 ක් තුළ ලකුණු බින්දුවකට දැවී යාම ද කැපී පෙනුණා.(දර්ශන පහතින්)
ඉන්දීය දෙවැනි ඉනිමේ පළමු කඩුලු 5 ලකුණු 29 ක් තුළ බිද වැටුණා. රිෂාබ් පාන්ට් පන්දු 57 කින් ලකුණු 64 ක් ලබා ගනිමින් සිය කණ්ඩායම ජයග්‍රහනය කරා රැගෙන යාමට දැඩි උත්සාහයක නිරත වූ නමුත්, එය සාර්ථක වූයේ නැහැ.
පන්දු යැවීමේ දී පළමු ඉනිමේ දී කඩුලු පහක් දවා ගත් අජාස් පටෙල් දෙවැනි ඉනිමේ දී කඩුලු හයක් බිද හෙලීමට සමත් වුණා. ග්ලේන් පිලිප්ස් දවා ගත් කඩුලු ගණන 3 ක්.
මෙම තරගයේ පළමුව පන්දුවට පහරදුන් නවසීලන්තය සියලු දෙනා දැවී ලකුණු 235 ක් ලබා ගත් අතර, පිළිතුරු ලෙස ඉන්දියාව සියලු දෙනා දැවී ලකුණු 263 ක් රැස් කළා.
— cric sl (@cricslvideo) November 3, 2024