LPL විස්තර විචාරක කමිටුවට ශ්‍රී ලංකා ප්‍රධාන පුහුණුකරුත් පත් කෙරේ

ලංකා ප්‍රිමියර් ලීග් හෙවත් එල්.පී.එල් ක්‍රිකට් තරගාවලියේ යාවත්කාලීන කරන ලද රූපවාහිනී විස්තර විචාරක කමිටුව අද(21) නිල වශයෙන් නිවේදනය කෙරුණා.

ඒ අනුව ශ්‍රී ලංකා ක්‍රිකට් කණ්ඩායමේ ප්‍රධාන පුහුණුකරු මිකී ආතර් ද ඊට ඇතුළත්ව තිබීම විශේෂත්වයක්.

මීට පෙර දකුණු අප්‍රිකාවේ හර්ෂල් ගිබ්ස් ලංකා ප්‍රිමියර් ලීග් තරගාවලියේ රූපවාහිනී විස්තර විචාරයට එක්වන බවට ප්‍රකශයට පත් කර තිබුණ ද ඔහු මේ වන විට කලම්බු කිංග්ස් කණ්ඩායමේ ප්‍රධාන පුහුණුකරු ලෙස පත් කර තිබෙනවා.

ඒ අනුව ඔහු වෙනුවටයි මිකී ආතර් ජාත්‍යන්තර රූපවාහිනී විස්තර විචාරක කමිටුවට පත් කර ඇත්තේ.

ජනප්‍රිය ක්‍රිකට් විස්තර විචාරකයකු වන ඔස්ට්‍රේලියානු ජාතික මයික් හෙයිස්මන් ද විස්තර විචාරක කමිටුවට ඇතුළත්.

එමෙන්ම ශ්‍රී ලාංකික විස්තර විචාරකයින් දෙපළක් වන රොෂාන් අබේසිංහ සහ රසල් ආනල්ඩ් යන මහත්වරු ද  එල්.පී.එල් තරගාවලියට විස්තර විචාරකයින් ලෙස එක් වන බවයි ශ්‍රී ලංකා ක්‍රිකට් ආයතනය සදහන් කළේ.

ඔවුන්ට අමතරව පාකිස්තානයේ අමීර් සොහෙයිල් සහ බටහිර ඉන්දීය කොදෙව් දූපත්හි ඩැරන් ගංගා ද LPL තරගාවලියේ විස්තර විචාරක කමිටුවට ඇතුළත්ව සිටිනවා.

මෙවර ලංකා ප්‍රිමියර් ලීග් ක්‍රිකට් තරගාවලිය නොවැම්බර් 26 වැනිදා සිට හම්බන්තොට මහින්ද රාජපක්ෂ ක්‍රීඩාංගණයේදී පැවැත්වීමට නියමිතයි.

You might also like