කොන්වේගේ හා පිලිප්ස්ගේ ප්‍රහාරය හමුවේ බංග්ලාදේශය තරගාවලියෙන් ඉවතට විසි වෙයි

නවසීලන්තයේ පැවැත්වෙන තුන්කොන් පන්දුවාර 20යි 20 ක්‍රිකට් තරගාවලියේ පස් වැනි තරගයෙන් බංග්ලාදේශය පරදා ලකුණු 48 ක ජයක් වාර්තා කිරීමට සත්කාරක නවසීලන්ත කණ්ඩායම අද(12) සමත් වුණා.

ඒ අනුව තරගාවලියේ අවසන් තරගයට සුදුසුකම් ලබා ගැනීමේ බලාපොරොත්තු බංග්ලාදේශයට අත්හැරීමට සිදු වූ අතර, නවසීලන්තය හා පාකිස්තානය අවසන් තරගයට සුදුසුකම් ලබා ගත්තා.

ක්‍රයිස්චර්ච් හි පැවැති තරගය ජය ගැනීම සදහා ලකුණු 209 ක දැවැන්ත ඉලක්කයක් හඹා ගිය බංග්ලාදේශයට පන්දුවාර 20 තුළ කඩුලු 7 ක් දැවී ලබා ගත හැකි වූයේ ලකුණු 160 ක් පමණයි.

නායක ශකිබ් අල් හසාන් ලකුණු 70 ක් ලබා ගත්තේ පන්දු 44 කින්. ඔහුගේ ඉනිමට හයේ පහරක් හා හතරේ පහර 8 ක් ඇතුළත්.
ලිටොන් දාස් හා සෞම්‍ය සාකාර් ලකුණු 23 බැගින් රැස් කළා.

පන්දු යැවීමේ දී ඇඩම් මිල්න් ලකුණු 24 කට කඩුලු 3 ක් දවා ගත් අතර, ටිම් සවුති හා මයිකල් බ්‍රේස්වෙල් කඩුලු 2 බැගින් බිද හෙලුවා.

තරගයේ කාසියේ වාසිය දිනූ බංග්ලාදේශයේ ආරාධනයෙන් පළමුව පන්දුවට පහරදුන් නවසීලන්ත පිල පන්දුවාර 20 තුළ ලකුණු 208 ක් ලබා ගත්තේ කඩුලු 5 ක් දැවී සිටියදීයි.

ඩෙවෝන් කොන්වේ පන්දු 40 කින් ලකුණු 64 ක් හා ග්ලේන් පිලිප්ස් පන්දු 24 කින් වේගවත් ලකුණු 60 ක් ලබා ගැනීමට සමත් වුණා. පිලිප්ස්ගේ ඉනිම හයේ පහර 5 කින් හා හතරේ පහර 2කින් වර්ණවත් වුණා.

පන්දු යැවීමේ දී මොහමඩ් සයිෆුදීන් හා එබඩොට් හොසේන් කඩුලු 2 බැගින් බිද හෙලුවා.

මේ වන විට නවසීලන්ත කණ්ඩායම තරග 4 කදී ප්‍රසාද ලකුණු 6 ක් හිමි කර ගනිමින් ප්‍රසාද ලකුණු සටහනේ පෙරමුණේ පසුවන අතර, පාකිස්තානය ප්‍රසාද ලකුණු 4 ක් හිමි කර ගනිමින් එහි දෙවැනි ස්ථානයේ රැදී සිටිනවා.

බංග්ලාදේශය මේ දක්වා ක්‍රීඩා කළ තරග තුනම ඔවුන් පරාජයට පත්ව තිබෙනවා.

pic.twitter.com/1qTla8Ol4Q

— cric fun (@cric12222) October 12, 2022