අවසන් පන්දුවෙන් ඔස්ට්‍රේලියාවට අනපේක්ෂිත පරාජයක් – Match Report

සංචාරක ඔස්ට්‍රේලියා කණ්ඩායම සමග පැවැති පළමු පන්දුවාර 20යි 20 ක්‍රිකට් තරගයෙන් ලකුණු දෙකක තියුණු ජයක් වාර්තා කිරීමට එංගලන්ත කණ්ඩායම සමත් වුණා.

සවුත්හැම්ටන්හි පැවැති තරගයේ පළමුවෙන් පන්දුවට පහරදුන් එංගලන්තය කඩුලු 7ක් දැවී ලකුණු 162ක් ලබා ගත්තා.

ඩාවිඩ් මලාන් ලකුණු 66ක් සහ ජොස් බට්ලර් ලකුණු 44ක් රැස් කළා.

සෙසු කිසිදු නම් දැරූ පිතිකරුවෙකුට ලකුණු 10 සීමාව පසු කර යාමට නොහැකි වූ අතර, ක්‍රිස් ජෝඩන් නොදැවී ලකුණු 14ක් ලබා ගත්තා.

පන්දු යැවීමේ දී ඇෂ්ටන් ඒගාර්, ග්ලේන් මැක්ස්වෙල් සහ කේන් රිචර්ඩ්සන් කඩුලු 2 බැගින් බිද හෙලුවා.

පිළිතුරු ඉනිම ක්‍රීඩා කළ ඔස්ට්‍රේලියාවට කඩුලු 6ක් දැවී ලබා ගත හැකි වූයේ ලකුණු 160ක් පමණයි.

ඩේවිඩ් වෝනර් ලකුණු 58ක් සහ නායක ආරෝන් ෆින්ච් ලකුණු 46ක් ලබා ගත් අතර, ඔවුන් දෙදෙනා අතර ආරම්භක කඩුල්ල වෙනුවෙන් පන්දුවාර 11කදී ගොඩනැගුණු සබදතාවය ලකුණු 98ක්.

ඒ වන විට ඔස්ට්‍රේලියාවට තරගය ජය ගැනීම සදහා පන්දු 54කදී ලබා ගත යුතුව තිබුණේ කඩුලු 9ක් අතැතිව ලකුණු 65ක් පමණයි.

ඉනිමේ අවසන් පන්දු 36 තුළ දී ද ඔස්ට්‍රේලියාවට තරගය ජය ගැනීමටනම් ලකුණු 39ක් පමණක් ලබා ගත යුතු වූ නමුත්, ඔවුන් එම පන්දුවාර 6 තුළ දී රැස් කළේ කඩුලු 5ක් දැවී ලකුණු 36ක් පමණයි.

ස්ටීව් ස්මිත් ලකුණු 18ක් සහ මර්කස් ස්ටොයිනිස් නොදැවී ලකුණු 23ක් රැස් කළ ද එය ඔස්ට්‍රේලියාවට ජයග්‍රහනයක් ගෙන ඒම සදහා ප්‍රමාණවත් වූයේ නැහැ.

පන්දු යැවීමේ දී ජොෆ්ර ආචර් සහ අඩිල් රෂීඩ් අතරේ කඩුලු 2 බැගින් බෙදී ගියා.

දෙරට අතර පැවැත්වෙන තරග 3කින් යුත් 20යි 20 තරගාවලියේ දෙවන තරගය හෙට(6) මෙරට වේලාවෙන් පස්වරු 6.45ට ආරම්භ වීමට නියමිතයි.

විශේෂ අවස්ථා පහතින් –

You might also like