ඉන්දීය පිතිකරුවන් වන ප්‍රිත්වි ෂෝ හා සූර්යකුමාර් යාදෙව් එංගලන්තයේ දී ඉන්දීය ටෙස්ට් සංචිතය සමග එක්වීමට නියමිතව ඇති බව ඉන්දීය මාධ්‍ය වාර්තා කරනවා.
ඒ, එංගලන්ත තරග සංචාරයක නිරත ඉන්දීය ටෙස්ට් සංචිතයේ ක්‍රීඩකයින් තිදෙනෙකු ආබාධවලට ලක්වීම හේතුවෙන්.
ෂුබ්මන් ගිල්, වොෂින්ටන් සුන්දර් හා අවේෂ් ඛාන් යන ක්‍රීඩකයින් එලෙස ආබාධවලට ලක්ව ඇති අතර, ඒ හේතුවෙන් ඔවුන්ට එළඹෙන තරග 5කින් යුත් ටෙස්ට් තරගාවලිය අහිමි වී තිබෙනවා.
ලෝක ටෙස්ට් ශූරතාවලියේ අවසන් තරගයෙන් පසුව ආබාධයකට ලක් වීම නිසා ෂුබ්මන් ගිල්ට යළි සියරට බලා පිටත්ව යාමට සිදු වූ අතර, අනෙක් ක්‍රීඩකයින් දෙදෙනා නිමා වූ පුහුණු තරගයේ දී යි ආබාධවලට ලක්ව තිබුණේ.
ප්‍රිත්වි ෂෝ හා සූර්යකුමාර් යාදෙව් මේ වන විට ශ්‍රී ලංකාවේ රැදී සිටින්නේ ඉන්දු – ශ්‍රී ලංකා සීමිත පන්දුවාර තරගාවලි ක්‍රීඩා කිරීම සදහායි.
ඒ අනුව ඔවුන් දෙදෙනා කොළඹ සිට ලන්ඩන් නුවර බලා පිටත්ව යාමට නියමිතව ඇතත්, කුමන දිනයක දී ඔවුන් එංගලන්තය බලා පිටත්ව යනු ඇත්දැයි මෙතෙක් නිශ්චිතව තොරතුරු වාර්තා වන්නේ නැහැ.