ශ්‍රී ලංකා ක්‍රිකට් කණ්ඩායමේ පන්දු යැවීමේ උපාය මාර්ගික පුහුණුකරු (Bowling Strategy Coach) වශයෙන් ශ්‍රී ලංකා හිටපු සුපිරි වේග පන්දු යවන ක්‍රීඩක ලසිත් මාලිංග පත් කළ බව ශ්‍රී ලංකා ක්‍රිකට් ආයතනය අද(26) නිවේදනයක් නිකුත් කරමින් තහවුරු කළා.
එම පත් කිරීම ශ්‍රී ලංකා කණ්ඩායමේ එළඹෙන ඕස්ට්‍රේලියානු තරග සංචාරය සදහා පමණක් බලපැවැත්වෙන බවයි ක්‍රිකට් ආයතනය සදහන් කළේ.
ශ්‍රී ලංකා පන්දු යවන්නන්ට උපායශීලී අවබෝධයක් සහ තාක්ෂණික විශේෂඥ දැනුමක් ලබා දීම මාලිංගගේ කාර්යය භාරය වනු ඇති.
ඒ තුළින් උපාය මාර්ගික සැලසුම් තරග පිටියේ දී ක්‍රියාත්මක කිරීම වෙනුවෙන් සහාය ලබා දීම ලසිත් මාලිංගට පැවරෙන වගකීමයි.
මාලිංගගේ අත්දැකීම් හා ඉනිමක අවසන් පන්දුවාර යැවීමේ ඔහුගේ ප්‍රවීණතාවය මෙම තරගාවලියේ දී ශ්‍රී ලංකා කණ්ඩායමට වැදගත් වනු ඇති බවටයි ශ්‍රී ලංකා ක්‍රිකට් ආයතනය විශ්වාසය පල කරන්නේ.
“අපි සතුව ඉන්නවා ගොඩක් දක්ෂ තරුණ පන්දු යවන්නන්. ඔවුන්ගේ දියුණුවට උපකාර කිරීම සඳහා මගේ අත්දැකීම් සහ දැනුම බෙදා ගැනීමට ඇති අවස්ථාව ගැන මම ඉතා සතුටට පත්වෙනවා.” යනුවෙන් ලසිත් මාලිංග නව පත්වීම සම්බන්ධයෙන් අදහස් දක්වමින් සදහන් කළා.
ශ්‍රී ලංකා ක්‍රිකට් ආයතනයේ විධායක කමිටුව විසින් මෙම පත් කිරීම සිදු කර ඇත්තේ ක්‍රිකට් තාක්ෂණික උපදේශක කමිටුවේ ද උපදෙස් අනුවයි.
පෙබරවාරි පළමු වැනිදා සිට 20 වැනිදා දක්වා ඔහු අදාළ ධූරයේ කටයුතු කරනු ඇති බව ද ක්‍රිකට් ආයතනය සදහන් කළා
ඔස්ට්‍රේලියානු තරග සංචාරයේ දී දෙරට අතර 20යි 20 තරග 5ක් පැවැත්වීමට නියමිතව ඇති අතර, පළමු තරගය පැවැත්වෙන්නේ පෙබරවාරි 11 වනදායි.