LPL කණ්ඩායම් හිමිකරුවන්ට යැවූ ක්‍රීඩකයින් 10 දෙනාගේ නම් නිවේදනය කෙරේ
මෙවර ලංකා ප්‍රිමියර් ලීග් (LPL) ක්‍රිකට් තරගාවලිය සදහා එක් කණ්ඩායමක සංචිතයකට ඇතුළත් කර ගත හැකි ක්‍රීඩකයින්ගේ සංඛ්‍යාව 20 සිට 22 දක්වා ඉහළ නැංවීමත් සමග කණ්ඩායම් සදහා අලුතින් තෝරා ගත හැකි ක්‍රීඩකයින් 10 දෙනාගේ නම් ශ්‍රී ලංකා ක්‍රිකට් ආයතනය අද(12) නිවේදනය කළා.
තරගාවලි සංවිධායකයින් විසින් මෙම තීරණය ඊයේ ගෙන තිබුණේ මෙවර තරගාවලිය වෙනුවෙන් පැවැති ක්‍රීඩක තෝරා ගැනීමේ අවස්ථාවේ දී (Draft) ප්‍රධාන ක්‍රීඩකයින් කිහිප දෙනෙකුම තෝරා නොගැනීමට කණ්ඩායම් හිමිකරුවන් ගත් තීරණය හේතුවෙන්.
ඒ අනුව එලෙස තෝරා නොගත් ක්‍රීඩකයින් 10 දෙනෙකුගේ නම් කණ්ඩායම් හිමිකරුවන් වෙත යොමු කර ඇති අතර, ඉන් ක්‍රීඩකයින් දෙදෙනෙකු බැගින් තෝරා ගැනීමට කණ්ඩායම් හිමිකරුවන් වෙත තරගාවලි සංවිධායකයින් යළි අවස්ථාව ලබා දී තිබෙනවා.
ඇන්ජෙලෝ මැතිව්ස්, දිනේෂ් චන්දිමාල්, කුසල් ජනිත් පෙරේරා, ධනංජය ද සිල්වා, අකිල ධනංජය, ප්‍රවීන් ජයවික්‍රම, මිනෝද් භානුක, සධීර සමරවික්‍රම, අශාන් ප්‍රියන්ජන් හා ශිරාන් ප්‍රනාන්දු යන ක්‍රීඩකයින්ගේ නම් මෙලෙස කණ්ඩායම් හිමිකරුවන් වෙත යොමු කර ඇති බවයි ක්‍රිකට් ආයතනය නිවේදනය කළේ.
ක්‍රීඩකයින් තෝරා ගැනීමේ අනුපිළිවෙල කණ්ඩායම් හිමිකරුවන් සමග සාකච්ඡා කර ඉදිරියේ දී තීරණය කරනු ඇති.
ලංකා ප්‍රිමියර් ලීග් තරගාවලියේ දෙවැනි අදියර ලබන දෙසැම්බර් 5 වනදා සිට 23 වනදා දක්වා කොළඹ දී හා හම්බන්තොට දී පැවැත්වීමට නියමිතයි.