CPL යන්න ශකිබ්ට අවසර නොලැබෙන ලකුණු
බංග්ලාදේශ තුන් ඉරියව් ක්‍රීඩක ශකිබ් අල් හසාන්ට මෙවර කැරිබියන් ප්‍රිමියර් ලීග් (සී.පී.එල්) තරගාවලියට ක්‍රීඩා කිරීම සදහා බංග්ලාදේශ ක්‍රිකට් ආයතනයෙන් අවසර නොලැබෙනු ඇති බව වාර්තා වනවා.
ඒ, සී.පී.එල් තරගාවලිය පැවැත්වෙන කාලයේ දී බංග්ලාදේශ කණ්ඩායමට කාර්යය බහුල ජාත්‍යන්තර තරග කාලසටහනක් පවතින බැවින්.
එහිදී ඔවුන් ඔස්ට්‍රේලියාව, එංගලන්තය සහ නවසීලන්තයට එරෙහිව තරග වැදීමට නියමිතයි.
“අපි ඒ ගැන (අවසර ලබා දීම ගැන) කිසිම තීරණයක් අරගෙන නැහැ.” යනුවෙන් බංග්ලාදේශ ක්‍රිකට් ආයතනයේ ක්‍රිකට් මෙහෙයුම් ප්‍රධානී අක්‍රම් ඛාන් විදෙස් මාධ්‍යකට කියා සිටියා.
“කාලය ආවම අපිට පුලුවන් ඒ ගැන තීරණයක් ගන්න. අපිට නිසැකවම අවශ්‍යයි ක්‍රීඩා කරන්න ඔවුන්ට එරෙහිව අපේ ශක්තිමත්ම සංචිතය සමගින්”
මීට පෙර ශකිබ් අල් හසාන් ඉන්දීය ප්‍රිමියර් ලීග් තරගාවලියට ක්‍රීඩා කිරීම වෙනුවෙන් ශ්‍රී ලංකා ටෙස්ට් තරග සංචාරයෙන් ද ඉවත් වුණා.
2021 සී.පී.එල් තරගාවලිය වෙනුවෙන් ඔහු ක්‍රීඩා කිරීමට නියමිතව ඇත්තේ ජැමයිකා තලවාස් කණ්ඩායම සදහායි.