බැංගලෝරය ඉවතට – හයිදරාබාද් කණ්ඩායම තෙවැනි අවසන් තරගයට – Match Report
BCCI
ඉන්දීය ප්‍රිමියර් ලීග් ක්‍රිකට් තරගාවලියේ අවසන් වටයේ (playoffs) තෙවැනි තරගයට (Qualifier 2) සුදුසුකම් ලබා ගැනීමට සන්රයිසස් හයිදරාබාද් කණ්ඩායම සමත් වුණා.
ඒ, අද(6) පැවැති මෙවර අයි.පී.එල් තරගාවලියේ අවසන් වටයේ දෙවැනි තරගයෙන් (Eliminator) ඔවුන් රෝයල් චැලෙන්ජර්ස් බැංගලෝර් කණ්ඩායමට එරෙහිව කඩුලු 6ක ජයක් වාර්තා කිරීමත් සමගයි.
ඒ අනුව හයිරාබාද් කණ්ඩායම අනිද්දා (8) දිල්ලි කැපිටල්ස් කණ්ඩායමට එරෙහිව අබුඩාබි ක්‍රීඩාංගනයේ දී අවසන් වටයේ තෙවැනි තරගය සදහා ක්‍රීඩා කරනු ඇති.
ඉන් ජය ගන්නා කණ්ඩායම මුම්බායි ඉන්දියන්ස් කණ්ඩායමට එරෙහිව ලබන 10 වැනිදා පැවැත්වෙන තරගාවලියේ අවසන් තරගය සදහා සුදුසුකම් ලබනවා.
අද අබුඩාබි ක්‍රීඩාංගනයේ පැවැති අවසන් වටයේ දෙවැනි තරගයේ කාසියේ වාසිය දිනූ හයිදරාබාද් කණ්ඩායම පළමුවෙන් පන්දුවට පහර දීමේ අවස්ථාව බැංගලෝර් පිලට ලබා දුන්නා.
ඒ අනුව බැංගලෝර් පිල නියමිත පන්දුවාර 20 අවසන් කළේ කඩුලු 7ක් දැවී ලකුණු 131ක් ලබා ගනිමින්.
ආරම්භක පිතිකරුවෙකු ලෙස පිටියට පිවිසි නායක විරාට් කෝලි ලකුණු 6කට දැවී ගිය අතර, ඒබී ඩි විලියස් ලකුණු 56ක් සහ ආරෝන් ෆින්ච් ලකුණු 32ක් රැස් කරමින් බැංගලෝර් කණ්ඩායම ගෞරවාන්විත ලකුණු සංඛ්‍යාවක් කරා රැගෙන ගියා.
- ALSO READ : තීරණාත්මක තරගයේ දී කෝලි අසාර්ථක වූ හැටි
පන්දු යැවීමේ දී ජේසන් හෝල්ඩර් කඩුලු 3ක් සහ ටී.නටරාජන් කඩුලු 2ක් බිද හෙලුවා.
පිළිතුරු ඉනිම ක්‍රීඩා කළ හයිදරාබාද් කණ්ඩායම පන්දුවාර 19.4ක් අවසානයේ කඩුලු 4ක් දැවී ජයග්‍රාහී ඉලක්කය පසු කළා.
කේන් විලියම්සන් නොදැවී ලකුණු 50ක්, ජේසන් හෝල්ඩර් නොදැවී ලකුණු 24 ක් සහ මනීෂ් පාන්ඩේ ලකුණු 24ක් ලබා ගනිමින් හයිදරාබාද් ඉනිම ශක්තිමත් කළා.
පන්දු යැවීමේ දී මොහොමඩ් සිරාජ් කඩුලු 2ක් බිද හෙලීමට සමත් වුණා.
මෙම තරගය සදහා රෝයල් චැලෙන්ජර්ස් බැංගලෝර් කණ්ඩායම වෙනුවෙන් ඉසුරු උදාන ක්‍රීඩා කළේ නැහැ.