අබුඩාබි T10 තරගාවලියට දින නියම වෙයි
අබුඩාබි T10 තරගාවලියේ 5 වන අදියර මෙම වසරේ දී පැවැත්වීම සදහා දින නියම කර තිබෙනවා.
ඒ අනුව නොවැම්බර් 19 වනදා සිට දෙසැම්බර් 4 වනදා දක්වා තරගාවලිය පැවැත්වීමට නියමිතයි.
තරගාවලිය දින 15ක් පුරා පැවැත්වීමට නියමිත අතර, මීට පෙර පැවැති අබුඩාබි T10 තරගාවලි කිසිවක් එතරම් දින සංඛ්‍යාවක් දක්වා පවත්වා තිබුණේ නැහැ.
දෙසැම්බර් දෙවැනිදාට යෙදෙන එක්සත් අරාබි එමීර් රාජ්‍යයේ 50 වැනි ජාතික දින සැමරුම මීට හේතු වී ඇති බව සදහන්.
මෙවර 20යි 20 ලෝක කුසලාන ක්‍රිකට් තරගාවලිය ද නොවැම්බර් 15 වනදා දක්වා ඉන්දියාවේ දී පැවැත්වීමට නියමිතව ඇති නමුත් එරට පවතින කොවිඩ් 19 වසංගත තත්ත්වය හේතුවෙන් ඇතැම් විට ලෝක කුසලාන තරගාවලිය එක්සත් අරාබි එමීර් රාජ්‍යයේ පැවැත්වීමට කටයුතු කිරීමට ද ඉඩ තිබෙනවා.
එසේ වුවහොත්, ලෝක කුසලානයට සහභාගී වන ක්‍රීඩකයින්ට (T10 තරගාවලියට ද එක්වන) ගුවන් සංචාරයක් නොමැතිව සහ නිරෝධායනයකට යටත් නොවී T10 තරගාවලිය සදහා එක්වීමේ අවස්ථාව ද උදා වනු ඇති.
අබුඩාබි T 10 තරගාවලියේ සිව්වන අදියර පසුගිය ජනවාරි සහ පෙබරවාරි මාසවලදී පැවැති අතර, එහි ශුරතාවය දිනා ගත්තේ නොදන් වොරියර්ස් කණ්ඩායමයි.