හබිබුල් බෂාර්ටත් කොරෝනා
බංග්ලාදේශ ක්‍රිකට් කණ්ඩායමේ හිටපු නායකයෙකු සහ වත්මන් තේරීම් කමිටු සාමාජිකයෙකු වන හබිබුල් බෂාර්ට කොරෝනා වෛරසය (කොවිඩ් 19) ආසාදනය වී තිබෙනවා.
බංග්ලාදේශ ටෙස්ට් නායක මොමිනුල් හක් සහ තුන් ඉරියව් ක්‍රීඩක මහ්මුදුල්ලාහ් ද කොරෝනා වෙරසය ආසාදනය වූවන් ලෙස හදුනා ගෙන ඇති පසුබිමකයි මෙම පුවත ද වාර්තා වන්නේ.
ඒ අනුව හබිබුල් බෂාර් මේ වන විට ඔහුගේ නිවසේම හුදෙකලා කර ඇති බව සදහන්.
කෙසේ වෙතත්, මෙම මස අවසානයේ පැවැත්වෙන බංගබන්දු 20යි 20 කුසලාන තරගාවලිය ආරම්භ වන විට ඔහු සුවය ලබා සිටිනු ඇති බවට විශ්වාසය පල කෙරෙනවා.
“මම ගොඩක් ප්‍රවේශම් වුණා. ඒත් මට වෛරසය ආසාදනය වුණා.” යනුවෙන් හබිබුල් බෂාර් Bangla Tribune පුවත් වෙබ් අඩවියට සදහන් කළා.
පසුගිය කාලයේ දී අබු ජයිඩ්, සයිෆ් හසාන් සහ මශ්රෆි මොටාසා යන ක්‍රීඩකයින්ට ද කොරෝනා වෛරසය ආසාදනය වී තිබුණා.
බංග්ලාදේශය තුළ මේ වන විට කොරෝනා ආසාදිත රෝගීන් 425,353කට වැඩි පිරිසක් වාර්තා වී ඇති අතර, 6,000කට වැඩි පිරිසක් මිය ගොස් තිබෙනවා.