Ultimate magazine theme for WordPress.

ශ්‍රී ලංකා විකල්ප කණ්ඩායමේ ක්‍රීඩකයෙකුටත් කොරෝනා; භානුක ඇතුළු පිරිසක් නිරෝධායනයට

ඉන්දීය තරගාවලිය වෙනුවෙන් අවශ්‍ය වුවහොත් ආදේශ කිරීම සදහා සූදානම් කරමින් සිටි විකල්ප ශ්‍රී ලංකා සංචිතයේ ක්‍රීඩකයෙකුට ද කොවිඩ් 19 ආසාදනය වී ඇති බව වාර්තා වනවා.

පිතිකරු සදුන් වීරක්කොඩිට මෙලෙස වෛරසය ආසාදනය වී ඇති බව සදහන්.

ඔහු තවත් ක්‍රීඩකයින් 15 දෙනෙකු පමණ සමග කොළඹ දී පුහුණුවීම්වල නිරතවෙමින් සිටියේ කොළඹ ප්‍රධාන හෝටලයක් තුළ නිර්මාණය කළ ජෛව ආරක්ෂිත බුබුලක් යටතේයි.

සදුන් වීරක්කොඩි, භානුක රාජපක්ෂ ඇතුළු ක්‍රීඩකයින් පිරිසක් පුහුණු තරග ක්‍රීඩා කිරීම සදහා ඊයේ(9) රාත්‍රී කාලයේ දී දඹුල්ලට පිටත් කර තිබූ බව ද වාර්තා වුණා.

කෙසේ වෙතත්, උද්ගතව ඇති නවතම තත්ත්වය හේතුවෙන් භානුක, අසේල ගුණරත්න, ඇන්ජෙලෝ පෙරේරා ඇතුළු කොළඹ දී ජෛව ආරක්ෂිත බුබුලක රැදී සිටි සියලු ක්‍රීඩකයින්ට ද මේ වන විට නිරෝධායනයට ලක්වීමට සිදුව තිබෙනවා.

තවත් ක්‍රීඩකයින් 24 දෙනෙකු දඹුල්ලේ දී ද ජෛව ආරක්ෂිත බුබුලක රැදී සිටින අතර, ඔවුන්ට මෙතෙක් කිසිදු බලපෑමක් එල්ල වී නැහැ.

එංගලන්ත තරග සංචාරය නිමා කර දිවයිනට පැමිණි ශ්‍රී ලංකා සංචිතයට සම්බන්ධ පුහුණු කාර්යය මණ්ඩල සාමාජිකයින් දෙදෙනෙකුට ද කොවිඩ් 19 ආසාදනය වී තිබූ අතර, ඒ හේතුවෙනුයි ඉන්දියාවට එරෙහි තරගාවලි වෙනුවෙන් අවශ්‍ය වුවහොත් ආදේශ කිරීම සදහා විකල්ප සංචිතයක් ශ්‍රී ලංකා ක්‍රිකට් ආයතනය මෙලෙස සූදානම් කර තිබුණේ.

එංගලන්ත සංචාරයට එක් වූ සියලු ක්‍රීඩකයින් ද මේ වන විට නිරෝධායනයට ලක් කර තිබෙනවා.

නිරෝධායනයට ලක් කිරීමට සිදු වූ, කොළඹ ජෛව ආරක්ෂිත බුබුලක රැදී සිටි ක්‍රීඩකයින් –

අශාන් ප්‍රියන්ජන්, අසේල ගුණරත්න, ඇන්ජෙලෝ පෙරේරා, සදුන් වීරක්කොඩි, මිලින්ද සිරිවර්ධන, ඩිල්ෂාන් මුණවීර, චතුරංග ද සිල්වා, රොෂේන් සිල්වා, ප්‍රභාත් ජයසූරිය, ලහිරු මධුෂංක, ළහිරු ගමගේ, මාලින්ද පුෂ්පකුමාර, ජෙෆ්රි වැන්ඩර්සේ, මහේල උඩවත්ත

Leave a comment
logo