ශකිබ් හදිසියේ යළි බංග්ලාදේශයට පිටත්වීමට ගත් තීරණය තාවකාලිකව අවලංගු කරයි
මේ වන විට දකුණු අප්‍රිකා තරග සංචාරයක නිරතව සිටින බංග්ලාදේශ කණ්ඩායමේ තුන් ඉරියව් ක්‍රීඩක ශකිබ් අල් හසාන් වහාම යළි සිය රට බලා පැමිණීමට ගෙන තිබූ තීරණය තාවකාලිකව අවලංගු කර තිබෙනවා.
කෙසේ වෙතත්, දෙරට අතර එළඹෙන 23 වනදා පැවැත්වෙන තෙවැනි හා අවසන් එක්දින තරගය ක්‍රීඩා කිරීමෙන් අනතුරුව ඔහු යළි බංග්ලාදේශය බලා පිටත්ව යාමට නියමිත බවයි බංග්ලාදේශ ක්‍රිකට් බළධාරීන් උපුටා දක්වමින් විදෙස් ක්‍රීඩා මාධ්‍ය වාර්තා කර ඇත්තේ.
පවුලේ සාමාජිකයින් රැසක් අසනීප තත්ත්වයන් හේතුවෙන් රෝහල් ගත කර ඇති බැවිනුයි ශකිබ් අල් හසාන් වහාම යළි බංග්ලාදේශයට පැමිණීමට තීරණය කර තිබු‍ණේ.
ඒ සදහා බංග්ලාදේශ ක්‍රිකට් ආයතනය අද (21) දිනයේ දී ගුවන් ප්‍රවේශ පත්‍රයක් ද ඔහු වෙනුවෙන් වෙන් කර තිබූ නමුත්, පසුව දකුණු අප්‍රිකාවට එරෙහි තෙවැනි එක්දින තරගය ක්‍රීඩා කිරීමෙන් අනතුරුව බංග්ලාදේශය බලා පිටත්ව යාමට ශකිබ් තීරණය කර තිබෙනවා.
දෙරට අතර පැවැත්වෙන එක්දින තරගාවලිය මේ වන විට තරග 1-1ක් ලෙස කණ්ඩායම් දෙකම සම තත්ත්වයේ පසුවනවා.