විලියම්සන් අභිබවා ලොව අංක එකේ පිතිකරු බවට රූට් පත් වෙයි
නවතම අයි.සී.සී ටෙස්ට් ක්රිකට් පිතිකරුවන් ශ්රේණිගත කිරීම්වලට අනුව එහි පෙරමුණ යළි හිමි කර ගැනීමට එංගලන්ත නායක ජෝ රූට් සමත්ව තිබෙනවා.
ඒ, ඉන්දියාව සමග පැවැත්වෙන ටෙස්ට් තරගාවලියේ දී අඛණ්ඩව දක්වමින් සිටින දක්ෂතා හේතුවෙන්.
රූට් මෙම තරගවලියේ ඉනිම් 5කදී ලකුණු 507ක් රැස් කර ඇත්තේ 126.75ක සාමාන්යයක් සටහන් කර ගනිමින්. ඊට ශතක 3ක් ද ඇතුළත්.
ඔහු ශ්රේණිගත කිරීම්හි පෙරමුණ හිමි කර ගත්තේ වසර 6කට පසුවයි.
රූට් ශ්රේණිගත ලකුණු 916කට හිමිකම් කියන අතර, මෙතෙක් පළමු ස්ථානයේ රැදී සිටි නවසීලන්ත නායක කේන් විලයම්සන් මේ වන විට දෙවැනි ස්ථානයේ පසුවන්නේ ශ්රේණිගත ලකුණු 901ක් ලබා ගනිමින්.
මේ අතර, ඉන්දීය ආරම්භක පිතිකරු රෝහිට් ෂර්මා ශ්රේණිගත කිරීම්හි 5 වැනි ස්ථානය දක්වා එක් ස්ථානයකින් ඉදිරියට පැමිණ තිබෙනවා.
ඒ, මෙතෙක් 5 වැනි ස්ථානයේ රැදී සිටි නායක විරාට් කෝලි 6 වැනි තැනට ඇද දමමින්.