විනය විරෝධීව හැසිරුණු ඉන්දීය නායිකාවට අයි.සී.සීයෙන් තරග තහනමක්
ඉන්දීය කාන්තා ක්‍රිකට් කණ්ඩායමේ නායිකා හර්මන්ප්‍රීට් කොවුර්ට එරෙහිව ජාත්‍යන්තර තරග දෙකක තහනමක් පැනවීමට ජගත් ක්‍රිකට් කවුන්සලය පියවර ගෙන තිබෙනවා.
ඒ, අයි.සී.සී විනය නීති සංග්‍රහය යටතේ ඇය සිදු කළ නීති උල්ලංඝනය කිරීම් දෙකක් හේතුවෙන්.
බංග්ලාදේශය සමග පැවැති අවසන් එක්දින ක්‍රිකට් තරගයේ දී දැවී යාමෙන් පසුව විනිසුරු තීරණයට විරෝධය පල කරමින් කඩුල්ලට සිය පිත්තෙන් පහර දීම ඇයට එල්ල වූ පළමු චෝදනාවයි. (වීඩියෝව පහතින්) එහිදී ඇය විනිසුරු තීරණයට විරෝධය පල කිරීම යන විනය නීති සංග්‍රහයේ 2.8 වගන්තිය උල්ලංඝනය කර තිබෙනවා.
එම වරද විනය නීති සංග්‍රහයේ දෙවැනි මට්ටමේ වරදක් බවත්, ඒ අනුව ඇයට තරග ගාස්තුවෙන් 50%ක දඩ මුදලක් මෙන්ම ඇයගේ විනය වාර්තාවට දඩුවම් ලකුණු 3 ක් ද ඇතුළත් කිරීමට පියවර ගත් බවත්, අයි.සී.සීය සදහන් කළා.
මෙම වරදට අමතරව හර්මන්ප්‍රීට් කොවුර් විසින් තරගයෙන් පසුව පැවැති සම්මාන ප්‍රදානෝත්සවයේ දී විනිසුරු තීරණ ප්‍රසිද්ධියේ විවේචනයට ද ලක් කළා.
ඒ තුළින් ඇය පළමු මට්ටමේ වරදක් සිදු කර ඇති බැවින් තරග ගාස්තුවෙන් 25% ක දඩ මුදලක් හා එක් දඩුවම් ලකුණක් අයි.සී.සීය විසින් නියම කර තිබෙනවා.
සම්මාන ප්‍රදානෝත්සවයෙන් පසුව තරගාවලියේ ශූරතාවය සමසේ බෙදී යාම හේතුවෙන් කණ්ඩායම් දෙකේම ක්‍රීඩිකාවන් සමූහ ඡායාරූපයකට පෙනී සිටි අතර, එහිදී ද ඉන්දීය නායිකාව විනය විරෝධීව හැසිරෙනු දක්නට ලැබුණා. ඒ හේතුවෙන් එහිදී බංග්ලාදේශ නායිකාව විසින් සිය ක්‍රීඩිකාවන් ක්‍රීඩාංගනයෙන් ඉවතට රැගෙන යාමට ද කටයුතු කළා.(දර්ශන පහතින්)
මාස 24 ක කාලයක් තුළ ක්‍රීඩකයෙකුගේ හෝ ක්‍රීඩිකාවකගේ දඩුවම් ලකුණු ප්‍රමාණය 4ක් දක්වා ඉහළ ගිය විට එය අත්හිටුවීමේ ලකුණු 2ක් බවට පරිවර්තනය වන අතර, එහිදී එක් ටෙස්ට් තරගයක් හෝ සීමිත පන්දුවාර තරග 2ක් තහනම් කිරීම සිදු වනවා.
සිය වරදවල් හා ලබා දුන් දඩුවම් ඉන්දීය නායිකාව විසින් පිළිගෙන ඇති බැවින් මෙම සිද්ධිය සම්බන්ධයෙන් වැඩිදුර විභාගයක් සිදු වන්නේ නැහැ.
ඇයට ලබා දුන් තහනම හේතුවෙන් ආසියානු ක්‍රීඩා උළෙලේ ක්‍රිකට් තරගාවලිය යටතේ ඉන්දියාව ක්‍රීඩා කරන පළමු තරග දෙක ක්‍රීඩා කිරීමේ අවස්ථාව හර්මන්ප්‍රීට් කොවුර්ට අහිමි වනු ඇති.
ICC has suspended Harmanpreet Kaur for 2 matches. pic.twitter.com/tBjAv2C97C
— Nawaz 🇵🇰 (@Rnawaz31888) July 25, 2023
Why are you only here? The umpires tied the match for you. Call them up! We better have a photo with them as well – Harmanpreet Kaur
Bangladesh Captain took her players back to the dressing room after this incident 😳#HarmanpreetKaur #INDvsBAN pic.twitter.com/dyKGwPrnfG
— OneCricket (@OneCricketApp) July 23, 2023