විනය නීති කැඩූ අසිතට අයි.සී.සීයෙන් දඩුවම්
ශ්‍රී ලංකා වේග පන්දු යවන ක්‍රීඩක අසිත ප්‍රනාන්දුට එරෙහිව ජගත් ක්‍රිකට් කවුන්සලය (අයි.සී.සී) විසින් නිල අනතුරු ඇගවීමක් සිදු කර තිබෙනවා.
ඒ, පාකිස්තානය සමග මේ දිනවල කොළඹ එස්.එස්.සී ක්‍රීඩාංගනයේ දී පැවැත්වෙන දෙවැනි ටෙස්ට් ක්‍රිකට් තරගයේ තෙවැනි දිනය වූ අද(26) දිනයේ දී අයි.සී.සී විනය නීති සංග්‍රහය උල්ලංඝනය කිරීම හේතුවෙන්.
පාකිස්තාන පළමු ඉනිමේ 81 වැනි පන්දුවාරයේ දී අසිත විසින් සවුද් ශකීල් දවා ගැනීමෙන් පසුව කඩුලු සැමරුම ආවේගශීලී අයුරින් සිදු කිරීම ඔහුට එරෙහිව එල්ල වූ චෝදනාවයි.
එහිදී ඔහු විසින් අයි.සී.සී විනය නීති සංග්‍රහයේ 2.5 වගන්තිය උල්ලංඝනය කර ඇති බවයි ජගත් ක්‍රිකට් කවුන්සලය නිවේදනය කළේ.
ඒ අනුව ඔහුගේ විනය වාර්තාවට එක් දඩුවම් ලකුණක් ද පැනවීමට අයි.සී.සීය කටයුතු කර තිබෙනවා.
අසිත ප්‍රනාන්දු විසින් සිය වරද හා ලබා දුන් දඩුවම පිළිගෙන ඇති බැවින් මේ සම්බන්ධයෙන් වැඩිදුර විභාගයක් සිදු වන්නේ නැහැ.