ලුන්ගි එන්ගිඩීට දෙවැනි ටෙස්ට් තරගයත් අහිමි වෙයි
දකුණු අප්‍රිකානු වේග පන්දු යවන ක්‍රීඩක ලුන්ගි එන්ගිඩීට නවසීලන්තය සමග හෙට(25) ආරම්භ වන දෙවැනි හා අවසන් ටෙස්ට් ක්‍රිකට් තරගය ක්‍රීඩා කිරීමේ අවස්ථාව ද අහිමි වී තිබෙනවා.
පිට කොන්ද ආශ්‍රිතව සිදුව ඇති ආබාධයක් හේතුවෙනුයි ඔහුට එම තරගය අහිමි වී ඇත්තේ.
දකුණු අප්‍රිකාව ඉනිමක පරාජයකට ලක් වූ පළමු ටෙස්ට් තරගය සදහා ද එන්ගිඩීට ක්‍රීඩා කිරීමට හැකි වූයේ නැහැ.
පළමු ටෙස්ට් තරගය සදහා කාගිසෝ රබාඩා, මාර්කෝ ජන්සෙන්, ඩුවාන් ඔලිවියර් හා Glenton Stuurman යන වේග පන්දු යවන්නන් සිව් දෙනා සමගින් ක්‍රීඩා කිරීමට දකුණු අප්‍රිකාව කටයුතු කළා.
කෙසේ වෙතත්, එම තරගයේ දී නවසීලන්තය සිය පළමු ඉනිමට සියලු දෙනා දැවී ලකුණු 482ක් රැස් කිරීමට සමත් වුණා.
එම තරගයෙන් නවසීලන්තය ජය වාර්තා කළේ ඉනිමකින් හා ලකුණු 276 කින්.
දෙරට අතර පැවැත්වෙන අවසන් ටෙස්ට් තරගය හෙට(25) මෙරට වේලාවෙන් අලුයම 3.30ට ක්‍රයිස්චර්ච් හී දී ආරම්භ වීමට නියමිතයි.