යොවුන් ආසියානු කුසලානයට කොරෝනා රිංගයි; ශ්‍රී ලංකා – බංග්ලාදේශ තරගය අවලංගු කෙරේ
යොවුන් ආසියානු කුසලාන ක්‍රිකට් තරගාවලිය යටතේ අද(28) ආරම්භ වූ ශ්‍රී ලංකා – බංග්ලාදේශ තරගය අතරමගදී අවලංගු කිරීමට තරග සංවිධායකයින් පියවර ගෙන තිබෙනවා.
ඒ, තරගයට සම්බන්ධ තරග නිළධාරීන් දෙදෙනෙකුට කොවිඩ් 19 ආසාදනය වී ඇති බව අනාවරණය වීමත් සමගයි.
ඒ අනුව තරගයට එක් වූ සියලු දෙනා මේ වන විට කොවිඩ් 19 වෛද්‍ය පරීක්ෂාවන්ට යොමු කර ඇති බවයි ආසියානු ක්‍රිකට් කවුන්සලය සදහන් කළේ.
වෛද්‍ය පරීක්ෂණවල ප්‍රතිපල ලැබෙන තුරු ඔවුන් හුදකලා කිරීමට ද පියවර ගෙන තිබෙනවා.
මේ සම්බන්ධයෙන් හා තරගාවලියේ අවසන් පූර්ව වටයේ තරග සම්බන්ධයෙන් වැඩිදුර තොරතුරු ඉදිරියේ දී නිවේදනය කරන බව ද ආසියානු ක්‍රිකට් කවුන්සලය සදහන් කළා.
අද සාජා ක්‍රීඩාංගනයේ දී ආරම්භ වූ ශ්‍රී ලංකා – බංග්ලාදේශ යොවුන් කණ්ඩායම් අතර තරගය අවලංගු කරන අවස්ථාව වන විට තරගයේ කාසියේ වාසිය දිනූ ශ්‍රී ලංකාවේ ආරාධනයෙන් පළමුව පන්දුවට පහර දෙමින් සිටි බංග්ලාදේශ වයස අවුරුදු 19න් පහළ කණ්ඩායම පන්දුවාර 32.4ක් අවසානයේ කඩුලු 4ක් දැවී ලකුණු 130ක් ලබා සිටියා.