මිල්න්, යන්ග් හා නිකල්ස් නවසීලන්තයට තරගාවලියේ ජය තහවුරු කර දෙයි

බංග්ලාදේශය සමග පැවැති තරග 3කින් යුත් එක්දින ක්‍රිකට් තරගාවලිය තරග 2-0 ක් ලෙස ජය ගැනීමට සංචාරක නවසීලන්ත කණ්ඩායම අද(26) සමත් වුණා.

ඒ, දෙරට අතර පැවැති අවසන් එක්දින තරගයෙන් නවසීලන්තය කඩුලු 7ක ජයක් වාර්තා කිරීමත් සමගයි.

මීර්පූර්හි පැවැති තරගයේ කාසියේ වාසිය දිනා පළමුව පන්දුවට පහරදුන් බංග්ලාදේශය පන්දුවාර 34.3 ක් අවසානයේ සියලු දෙනා දැවී ලබා ගත්තේ ලකුණු 171 ක් පමණයි.

නායක නජ්මුල් හොසේන් ශන්ටෝ පන්දු 84 කින් ලකුණු 76 ක් රැස් කළා. ඒ, හතරේ පහර 10 ක් ද සමගින්.

පන්දු යැවීමේ දී ඇඩම් මිල්න් ලකුණු 34 කට කඩුලු 4 ක් දවා ගත්තා. ට්‍රෙන්ට් බෝල්ට් හා Cole McConchie අතරේ කඩුලු 2 බැගින් බෙදී ගියා.

පිළිතුරු ඉනිම ක්‍රීඩා කළ නවසීලන්තය පන්දුවාර 34.5 ක් අවසානයේ කඩුලු 3 ක් දැවී ජයග්‍රාහී ඉලක්කය පසු කළා.

විල් යන්ග් ලකුණු 70 ක් ලබා ගත් අතර, හෙන්රි නිකල්ස් නොදැවී ලකුණු 50 යි. පන්දු යැවීමේ දී ශොරිෆුල් ඉස්ලාම් කඩුලු 2 ක් බිද හෙලුවා.