මැතිව් වේඩ්ට තරග දෙකක තහනමක්
තස්මේනියා කඩුලු රකින ක්‍රීඩක මැතිව් වේඩ්ට තරග දෙකක තහනමක් පනවා තිබෙනවා.
ඒ, ක්‍රීඩක විනය නීති සංග්‍රහය මාස 18 ක කාලයක් තුළ තෙවැනි වරටත් උල්ලංඝනය කිරීම හේතුවෙන්.
Marsh Cup තරගාවලිය යටතේ වික්ටෝරියා කණ්ඩායමට එරෙහිව මෙල්බර්න්හි පැවැති තරගයේ දී යි ඔහු තෙවැනි වරටත් ක්‍රීඩක විනය නීති සංග්‍රහය මෙලෙස උල්ලංඝනය කළේ.
ඒ අනුව ඔහුට එරෙහිව ස්වයංක්‍රීයවම තරග දෙකක තහනමක් පැනවෙනවා.
අදාළ තරගයේ දී පිතිකරණයේ නිරතව සිටියදී මැතිව් වේඩ් විසින් නිලකුණු පන්දුවක් හමුවේ කණස්සල්ලට පත් වෙමින් ආවේගශීලී අයුරින් සිය පිත්තෙන් තණතීරුවට දැඩි පහරක් එල්ල කළා.
එය ඔස්ට්‍රේලියානු ක්‍රිකට් ආයතනයේ ක්‍රීඩක විනය නීති සංග්‍රහයේ 2.5 වගන්තිය උල්ලංඝනය කිරීමක් වනවා.
තමාට එරෙහිව එල්ල වූ චෝදනා මැතිව් වේඩ් විසින් පිළිගෙන තිබෙනවා.
ඒ අනුව ඔහුට Marsh Cup තරගාවලිය යටතේ තස්මේනියා කණ්ඩායම ක්‍රීඩා කරන මීළග තරග දෙක ක්‍රීඩා කිරීමට හැකි වන්නේ නැහැ.