Ultimate magazine theme for WordPress.

පැතුම්ගේ අනර්ඝ ශතකය චන්දිමාල්ගේ සුපිරි ප්‍රහාරය හමුවේ අපතේ යයි

Match Report

පැතුම් නිස්සංක වාර්තා කළ සිය මංගල විස්සයි 20 ශතකය අපතේ යවමින් දිනේෂ් චන්දිමාල්ගේ වේගවත් පිතිහරඹය හමුවේ 2024 ලංකා ප්‍රිමියර් ලීග් ක්‍රිකට් තරගාවලියේ 11 වැනි තරගයෙන් ජැෆ්නා කිංග්ස් කණ්ඩායම පරදා විශිෂ්ඨ හඹා යාමක් සමග කඩුලු 7 ක ජයක් වාර්තා කිරීමට කැන්ඩි ෆැල්කන්ස් කණ්ඩායම අද(9) සමත් වුණා.

දඹුල්ලේ පැවැති තරගයේ කාසියේ වාසිය දිනූ ෆැල්කන්ස් කණ්ඩායමේ ආරාධනයෙන් පළමුව පන්දුවට පහරදුන් කිංග්ස් කණ්ඩායම නියමිත පන්දුවාර 20 තුළ කඩුලු 7 ක් දැවී ලකුණු 224 ක් ලබා ගැනීමට සමත් වූ අතර, පිළිතුරු ඉනිම ක්‍රීඩා කළ ෆැල්කන්ස් පිල ඉනිම නිමා වීමට පන්දු 10 ක් ඉතිරිව තිබියදී ජයග්‍රාහී ඉලක්කය පසු කළේ කඩුලු 3 ක් දැවී සිටියදීයි. (230/3 [18.2])

මෙය ලංකා ප්‍රිමියර් ලීග් ඉතිහාසයේ දී කණ්ඩායක් සාර්ථක ලෙස තරගයක් හඹා ගොස් ජය ගත් ඉහළම ලකුණු සංඛ්‍යාව ලෙසයි වාර්තා අතරට එක් වුණේ.

කැන්ඩි ෆැල්කන්ස් හඹා යාම ශක්තිමත් කළ ආරම්භක පිතිකරු දිනේෂ් චන්දිමාල් පන්දු 37 කින් වේගවත් ලකුණු 89 ක් වාර්තා කිරීමට සමත් වුණා. හයේ පහර 7 ක් හා හතරේ පහර 8 ක් ඔහුගේ ඉනිමට ඇතුළත්.

අන්ඩ්‍රි ෆ්ලෙචර් ලකුණු 13 කටත්, මොහමඩ් හැරිස් ලකුණු 25 කටත් දැවී ගිය අතර, කමිදු මෙන්ඩිස් නොදැවී ලකුණු 65(36) ක් හා ඇන්ජෙලෝ මැතිව්ස් නොදැවී ලකුණු 29(13) ක් ලබා ගනිමින් සිය කණ්ඩායමට වාර්තාගත ජයක් හිමි කර දුන්නා.

පන්දු යැවීමේ දී ටබ්රයිස් ශම්සි ලකුණු 46 කට කඩුලු දෙකක් දවා ගත් අතර, ප්‍රමෝද් මදුෂාන් ලකුණු 33 කට කඩුල්ලක් බිද හෙලුවා.

පළමුව පන්දුවට පහරදුන් කිංග්ස් ඉනිම වෙනුවෙන් නිස්සංක ලකුණු 119 ක් ලබා ගත්තේ පන්දු 59 කින්. ඒ, හයේ පහර 4 ක් හා හතරේ පහර 16 ක් සමගින්.

ඔහු පන්දු 52 කින් සිය ශතකය වාර්තා කළ අතර, එය LPL ඉතිහාසයේ දී පිතිකරුවෙකු වාර්තා කළ දෙවැනි වේගවත්ම ශතකයයි. එමෙන්ම පැතුම් අද වාර්තා කළ ලකුණු 119 ඉතිහාසගත වුණේ LPL තරගයකදී පිතිකරුවෙකු රැස් කළ ඉහළම ලකුණු සංඛ්‍යාව ලෙසයි.

කුසල් මෙන්ඩිස් ලකුණු 26 ක්, රයිලි රොසෝව් ලකුණු 41 ක් හා අවිශ්ක ප්‍රනාන්දු ලකුණු 16 ක් රැස් කරමින් ජැෆ්නා කිංග්ස් ඉනිම ශක්තිමත් කළ අතර, පන්දු යැවීමේ දී දසුන් ශානක ලකුණු 40 කට කඩුලු 3 ක් බිද හෙලුවා. දුෂ්මන්ත චමීර හා රමේෂ් මෙන්ඩිස් කඩුලු 2 බැගින් දවා ගත්තා.

Leave a comment