දකුණු අප්‍රිකා ටෙස්ට් සංචිතයට වෙනසක්
දකුණු අප්‍රිකා තුන් ඉරියව් ක්‍රීඩක වියාන් මෝල්ඩර්ට ශ්‍රී ලංකාව සමග පැවැත්වීමට නියමිත දෙවැනි ටෙස්ට් ක්‍රිකට් තරගය ද ක්‍රීඩා කිරීමේ අවස්ථාව අහිමි වී තිබෙනවා.
ඒ, මේ දිනවල ඩර්බන්හි පැවැත්වෙන පළමු ටෙස්ට් ක්‍රිකට් තරගයේදී පන්දුවක් වැදීම නිසා ඔහුගේ දකුණු අතෙහි ඇගිල්ලක සිදුව ඇති අස්ථි බිදී යාම හේතුවෙන්.
ආබාධය හේතුවෙන් ඔහුට පළමු ටෙස්ට් තරගයේ ශ්‍රී ලංකා පළමු ඉනිමේදී ද පන්දු යැවීමට හෝ පන්දු රැකීමට නොහැකි වූ අතර, දෙවැනි ඉනිමේදී ද පන්දු යැවීමේ හෝ රැකීමේ අවස්ථාව අහිමි වී තිබෙනවා.
මෝල්ඩර් වෙනුවට Matthew Breetzke දෙසැම්බර් 5 වැනිදා Gqeberha හී දී ආරම්භ වන දෙවැනි ටෙස්ට් තරගය වෙනුවෙන් වන දකුණු අප්‍රිකා සංචිතයට ආදේශ කිරීමටයි දකුණු අප්‍රිකා ක්‍රිකට් ආයතනය තීරණය කර ඇත්තේ. 24 හැවිරිදි Breetzke පසුගිය මාසයේදීයි බංග්ලාදේශයට එරෙහිව ටෙස්ට් වරම් හිමි කර ගත්තේ.
තරගයේ දෙවැනි දිනය වූ ඊයේ (28) දිනයේදී දකුණු අප්‍රිකා පළමු ඉනිම වෙනුවෙන් පන්දුවට පහර දෙමින් සිටියදී ලහිරු කුමාරගේ පන්දුවක් දකුණු අතේ වැදීමෙන් මෝල්ඩර් මෙම ආබාධයට මුහුණ දුන්නා.
ආබාධය හේතුවෙන් මෝල්ඩර් එක් ලකුණක් ලබා සිටියදී පිටියෙන් ඉවත් වූ අතර, අනතුරුව ඔහු යළි පන්දුවට පහර දීමට පිටියට පිවිසියේ ඉනිමේ 9 වැනි කඩුල්ල දැවී යාමෙන් පසුවයි. ඔහු එම ඉනිමේදී නොදැවී ලකුණු 9 ක් රැස් කළා.
පසුව දෙවැනි දිනයේ දිවා ආහාරය අතරතුර ඔහුව වෛද්‍ය පරීක්ෂණයක් (x-ray) සදහා යොමු කර තිබූ අතර, එහිදී දකුණු අතෙහි මැදගිල්ලෙහි අස්ථි බිදී යාමක් සිදුව ඇති බව හදුනාගෙන තිබුණා.
පන්දු යැවීමට හෝ පන්දු රැකීමට හැකියාවක් නැතත්, ඔහු දකුණු අප්‍රිකා දෙවැනි ඉනිමේදී ද පන්දුවට පහර දීම සදහා පිටියට පිවිසුණා.