Ultimate magazine theme for WordPress.

තෙවැනි ටෙස්ට් තරගයටත් ඔස්ට්‍රේලියාවෙන් සාර්ථක ආරම්භයක්

Day 1 Report

සංචාරක එංගලන්ත කණ්ඩායම සහ ඔස්ට්‍රේලියානු කණ්ඩායම අතර පැවැත්වෙන තරග 5කින් යුත් අලුබදුන ටෙස්ට් ක්‍රිකට් තරගාවලියේ තෙවැනි තරගයේ පළමු දිනය අද(26) මෙල්බර්න් හී දී නිමා වුණේ දිනයේ වැඩි ගෞරව ඔස්ට්‍රේලියාවට හිමි කර දෙමින්.

දිනය නිමා වන විට සිය පළමු ඉනිම ක්‍රීඩා කරමින් සිටි ඔස්ට්‍රේලියාව එක් කඩුල්ලක් දැවී ලකුණු 61ක් ලබා සිටියා.

ඩේවිඩ් වෝනර් ලකුණු 38කට දවා ගැනීමට ජේම්ස් ඇන්ඩර්සන් සමත් වූ අතර, මර්කස් හැරිස් නොදැවී ලකුණු 20යි.

තරගයේ කාසියේ වාසිය දිනූ ඔස්ට්‍රේලියාව පළමුවෙන් පන්දු යැවීමටයි තීරණය කළේ.

ඒ අනුව පිටියට පිවිසි එංගලන්ත පිතිකරුවන්ට මෙම තරගයේ දී ද සාර්ථක වීමට ඔස්ට්‍රේලියානු පන්දු යවන්නන් ඉඩ ලබා දුන්නේ නැහැ.

එංගලන්ත ඉනිමේ සියලු පිතිකරුවන් පන්දුවාර 65.1ක් තුළ දැවී ගියේ ලකුණු 185ක් ලෙස ලකුණු පුවරුව සටහන්ව තිබියදීයි.

ආරම්භක පිතිකරුවන් වූ හසීබ් හමීඩ් ලකුණු නොලබා දැවී ගිය අතර, සැක් ක්‍රව්ලි ලකුණු 12යි. ඩාවිඩ් මලාන් ලකුණු 14කට දැවී ගියා.

මෙම ඉනිමේ දී ද යම් තරමකින් හෝ සාර්ථක වූ එකම පිතිකරුවා බවට පත් වූ නායක ජෝ රූට් ලකුණු 50ක් රැස් කිරීමට සමත් වුණා.

එය ඔහු ටෙස්ට් පිටියේ වාර්තා කළ 52 වැනි අර්ධ ශතකයයි.

ජොනී බෙයාර්ස්ටව් ලකුණු 35ක් හා බෙන් ස්ටොක්ස් ලකුණු 25ක් ලබා සිටියදී දැවී ගියා.

පන්දු යැවීමේ දී නායක පැට් කමින්ස් හා නේදන් ලියෝන් කඩුලු 3 බැගින් බිද හෙලුවා.

මිචෙල් ස්ටක් කඩුලු 2ක් ද, කැමරන් ග්‍රීන් හා මෙම තරගයේ දී ටෙස්ට් වරම් දිනා ගත් ස්කොට් බොලන්ඩ් එක් කඩුල්ල බැගින් ද දවා ගත්තා.

ඒ අනුව ඔස්ට්‍රේලියාව මේ වන විට පළමු ඉනිමේ දී පිටුපසින් පසුවන ලකුණු සංඛ්‍යාව 124ක්.

Leave a comment