තවත් ප්‍රබලයෙකුට ශ්‍රී ලංකාවට එරෙහි දෙවැනි ටෙස්ට් තරගය අහිමි වීමේ අවධානමක්
දකුණු අප්‍රිකා වේග පන්දු යවන ක්‍රීඩක ජෙරාල්ඩ් කොට්සියාට ශ්‍රී ලංකාව සමග පැවැත්වෙන දෙවැනි හා අවසන් ටෙස්ට් ක්‍රිකට් තරගය ක්‍රීඩා කිරීමේ අවස්ථාව අහිමි වීමේ අවධානයක් මතුව තිබෙනවා.
ඒ, දෙරට අතර අද (30) නිමා වූ පළමු ටෙස්ට් තරගයේදී ඔහු මුහුණ දුන් ආබාධයක් (groin niggle) හේතුවෙන්. පළමු ටෙස්ට් තරගයෙන් දකුණු අප්‍රිකාව ලකුණු 233 ක දැවැන්ත ජයක් හිමි කර ගත්තා.
ජෙරාල්ඩ් කොට්සියා හෙට දිනයේදී වෛද්‍ය පරීක්ෂණ වෙත මුහුණ දීමට නියමිතව ඇති අතර, ඉන් අනතුරුව ඔහු සම්බන්ධයෙන් අවසන් තීරණයක් ගැනීමට නියමිතයි.
පළමු ටෙස්ට් තරගයේ පළමු ඉනිමේදී ඔහු ලකුණු 18 කට කඩුලු 2 ක් හා දෙවැනි ඉනිමේදී ලකුණු 67 කට කඩුලු 2 ක් දවා ගත්තා.
පළමු ටෙස්ට් තරගයේදී පන්දුවක් වැදීම නිසා දකුණු අතෙහි ඇගිල්ලක සිදු වූ අස්ථි බිදී යාමක් හේතුවෙන් දකුණු අප්‍රිකා වේග පන්දු යවන තුන් ඉරියව් ක්‍රීඩක වියාන් මෝල්ඩර්ට ශ්‍රී ලංකාව සමග පැවැත්වීමට නියමිත දෙවැනි ටෙස්ට් ක්‍රිකට් තරගය අහිමි වී ඇති පසුබිමකයි ජෙරාල්ඩ් කොට්සියාට ද දෙවැනි ටෙස්ට් තරගය අහිමි වීමේ අවධානමක් මතුව ඇත්තේ.
මෝල්ඩර් වෙනුවට Matthew Breetzke දෙසැම්බර් 5 වැනිදා Gqeberha හී දී ආරම්භ වන දෙවැනි ටෙස්ට් තරගය වෙනුවෙන් වන දකුණු අප්‍රිකා සංචිතයට ආදේශ කිරීමට දකුණු අප්‍රිකා ක්‍රිකට් ආයතනය තීරණය කළා.
ලුන්ගි එන්ගිඩී හා නන්ඩ්‍රි බර්ගර් ද ආබාධවලට ලක්ව සිටීම හේතුවෙන් තේරීම් සදහා සලකා බැලීමට හැකි වන්නේ නැහැ.