තවත් එංගලන්ත වේග පන්දු යවන්නෙකුට 20යි 20 තරගාවලිය අහිමි වෙයි
ආබාධයක් හේතුවෙන් එංගලන්ත වේග පන්දු යවන ක්‍රීඩක ජොෂ් ටොන්ග්ට නවසීලන්තය සමග පැවැත්වීමට නියමිත පන්දුවාර 20යි 20 ක්‍රිකට් තරගාවලිය ක්‍රීඩා කිරීමේ අවස්ථාව අහිමි වී තිබෙනවා.
මෙතෙක් සීමිත පන්දුවාර තරගවලදී එංගලන්ත කණ්ඩායම නියෝජනය කර නොමැති ඔහු නවසීලන්තයට එරෙහිව සීමිත පන්දුවාර වරම් දිනා ගනු ඇති බවට අපේක්ෂා කෙරුණා.
25 හැවිරිදි ඔහු අයර්ලන්තයට හා ඔස්ට්‍රේලියාවට එරෙහිව ටෙස්ට් තරග දෙකක් මෙම ගිම්හාන සෘතුවේ දී ක්‍රීඩා කළ අතර, එහිදී කඩුලු 10ක් දවා ගැනීමට ජොෂ් ටොන්ග් සමත් වුණා.
ඔහු වෙනුවට ක්‍රිස් ජෝර්ඩන් එංගලන්ත 20යි 20 සංචිතයට නම් කිරීමටයි මේ වන විට පියවර ගෙන ඇත්තේ.
දෙරට අතර පැවැත්වෙන තරග 4කින් යුත් 20යි 20 තරගාවලිය එළඹෙන 30 වැනිදා චෙස්ටර්-ලී-ස්ට්‍රීට් හී දී ආරම්භ වීමට නියමිතයි.
මීට පෙර ජාත්‍යන්තර වරම් දිනා නොමැති එංගලන්ත වේග පන්දු යවන ක්‍රීඩක John Turner ට ද නවසීලන්තය සමග පැවැත්වීමට නියමිත පන්දුවාර 20යි 20 ක්‍රිකට් තරගාවලිය ක්‍රීඩා කිරීමේ අවස්ථාව අහිමි වුණා.
ඒ, එංගලන්තයේ පැවැත්වෙන හන්ඩ්‍රඩ් ක්‍රිකට් තරගාවලිය අතරතුර දී ඔහු මුහුණ දුන් ආබාධයක් හේතුවෙන්.
Turner වෙනුවට Brydon Carse එංගලන්ත 20යි 20 සංචිතය සදහා ආදේශ කිරීමටයි පසුව පියවර ගැනුණේ.