ට්‍රෙන්ට් බෝල්ට් දෙවැනි ටෙස්ට් තරගයටත් නැහැ
නවසීලන්ත වේග පන්දු යවන ක්‍රීඩක ට්‍රෙන්ට් බෝල්ට් දකුණු අප්‍රිකාව සමග පැවැත්වීමට නියමිත දෙවැනි හා අවසන් ටෙස්ට් ක්‍රිකට් තරගය ද ක්‍රීඩා නොකරන බව නවසීලන්ත කණ්ඩායමේ පුහුණුකරු Gary Stead පවසනවා.
නිසි පුහුණුවීම් සදහා ප්‍රමාණවත් කාලයක් නොලැබීම හේතුවෙන් ඔහු එලෙස එම තරගය සදහා ක්‍රීඩා නොකරන බවයි ඔහු සදහන් කළේ.
ප්‍රමාණවත් පුහුණුවක් නොමැතිව 32 හැවිරිදි ට්‍රෙන්ට් බෝලට් දෙවැනි ටෙස්ට් තරගයට ක්‍රීඩා කරවීම තුළින් ඔහු ආබාධයකට ලක්වීමේ අවධානමක් පවා ඇතිවිය හැකි බැවින් මෙම තීරණය ගෙන තිබෙනවා.
ඔහුගේ බිරිද ඔවුන්ගේ තෙවැනි දරු උපත වෙනුවෙන් සූදානමින් සිටි බැවිනුයි බෝල්ට් නිමා වූ පළමු ටෙස්ට් තරගයෙන් ඉවත් වුණේ.
ඒ අනුව ට්‍රෙන්ට් බෝල්ට් හට යළි නවසීලන්ත කණ්ඩායම නියෝජනය කිරීමේ අවස්ථාවක් හිමි වන්නේ ලබන ජූනි මාසයට යෙදී ඇති එංගලන්ත තරග සංචාරයේ දී යි.
ඊට පෙර පැවැත්වෙන නෙදර්ලන්ත තරගාවලිය සදහා ඔහුව නම් නොකරනු ඇති.
ඒ, මෙවර ඉන්දීය ප්‍රිමියර් ලීග් තරගාවලියට ක්‍රීඩා කරන නවසීලන්ත ක්‍රීඩකයින් නෙදර්ලන්තයට එරෙහි තරගාවලියට නම් නොකිරීමට නවසීලන්ත ක්‍රිකට් ආයතනය ගෙන ඇති තීරණය හේතුවෙන්.
සංචාරක දකුණු අප්‍රිකා කණ්ඩායම සමග පැවැති පළමු ටෙස්ට් තරගයෙන් නවසීලන්තය ඉනිමක ජයක් වාර්තා කළ අතර, දෙවැනි ටෙස්ට් තරගය එළඹෙන 25 වනදා ක්‍රයිස්චර්ච් හී දී ආරම්භ වීමට නියමිතයි.