ක්‍රීඩිකාවන් 9 දෙනෙකු සමග තරග කරන්න ලෝක කුසලානයේ දී අවසර
කොවිඩ් 19 රෝගය හේතුවෙන් නවසීලන්තයේ දී ආරම්භ වීමට නියමිත කාන්තා ලෝක කුසලාන එක්දින ක්‍රිකට් තරගාවලියට අදාළ තරග කොන්දේසි සංශෝදනයක් සිදු කිරීමට ජගත් ක්‍රිකට් කවුන්සලය (අයි.සී.සී) පියවර ගෙන තිබෙනවා.
ඒ අනුව කොවිඩ් 19 රෝගයෙන් කණ්ඩායමකට බලපෑමක් එල්ල වන අවස්ථාවක දී ක්‍රීඩිකාවන් 11 දෙනෙකු වෙනුවට 9 දෙනෙකු පමණක් පන්දු රකින්නියන් ලෙස යොදා ගැනීමට අවසර ලබා දීමටයි පියවර ගෙන ඇත්තේ.
සහාය කාර්යය මණ්ඩලයේ කාන්තාවන් දෙදෙනෙකු රැදී සිටින්නේනම් ඔවුන්ට පන්දු රැකීම සදහා අවස්ථාව උදා වනවා.
කෙසේ වෙතත්, එම කාන්තාවන් දෙදෙනාට පන්දු යැවීමට හෝ පන්දුවට පහර දීමට අවසර හිමි වන්නේ නැහැ.
තරගයක් සම්පූර්ණයෙන් පවත්වා අවසන් කර ගැනීම සදහායි මෙම පියවර ගැනීමට ජගත් ක්‍රිකට් කවුන්සලය තීරණය කර ඇත්තේ.
මේ අතර, මෙම ලෝක කුසලාන තරගාවලියේ දී ද තරගයක ලකුණු ප්‍රමාණය සම වූ අවස්ථාවකදී ජයග්‍රාහකයා තෝරා ගැනීම සදහා අඛණ්ඩව සුපිරි පන්දුවාර ක්‍රියාත්මක කරන බව ද අයි.සී.සීය සිහිපත් කළා.
මෙවර කාන්තා ලෝක කුසලාන තරගාවලිය මාර්තු 4 වැනිදා ආරම්භ වීමට නියමිතයි.