එංගලන්ත ලෝක කුසලාන සංචිතයට වෙනසක්
එළඹෙන එක්දින ලෝක කුසලාන ක්‍රිකට් තරගාවලිය සදහා වන එංගලන්ත සංචිතයට එක් වෙනසක් සිදු කිරීමට එරට ක්‍රිකට් තේරීම් කමිටුව පියවර ගෙන තිබෙනවා.
ඒ අනුව ජේසන් රෝයි වෙනුවට හැරී බෘෘක් සංචිතයට ආදේශ කිරීමටයි පියවර ගෙන ඇත්තේ.
මීට පෙර රෝයි ලෝක කුසලානයට නම් කෙරුණු ක්‍රීඩකයින් 15 දෙනෙකුගෙන් යුත් මූලික සංචිතයට ඇතුළත්ව සිටි නමුත්, පිට කොන්ද ආශ්‍රිත ආබාධයක් හේතුවෙන් නවසීලන්තය සමග නිමා වූ තරග 4 කින් යුත් එක්දින ක්‍රිකට් තරගාවලියේ කිසිදු තරගයක් සදහා ඔහුට ක්‍රීඩා කිරීමට හැකි වූයේ නැහැ.
රෝයි සංචිතයෙන් ඉවත් කිරීම හේතුවෙන් ලෝක කුසලාන තරගාවලියේ දී එංගලන්ත කණ්ඩායමේ ආරම්භක පිතිකරුවන් ලෙස ඩේවිඩ් මලාන් සමගින් ජොනී බෙයාර්ස්ටව් කටයුතු කිරීමට ඉඩ තිබෙනවා.
හැරී බෘෘක් ලෝක කුසලාන සංචිතයට නම් නොකිරීමට මීට පෙර ගෙන තිබූ තීරණය බොහෝ දෙනෙකුගේ දැඩි අවධානයක් යොමු වූ තීරණයක් බවට පත් වුණා.
එවැනි පසුබිමක වුවද, නවසීලන්තයට එරෙහි එක්දින තරගාවලියේ දී හැරී බෘෘක් සැලකිය යුතු දක්ෂතා පිත්තෙන් දැක්වීමට සමත් වූයේ නැහැ.
කෙසේ වෙතත්, පසුගිය වසරක පමණ කාලයේ දී ඔහු විශේෂයෙන් ටෙස්ට් පිටියේ දී ඉහළ දක්ෂතා දැක් වීමට සමත් වුණා.