ඉන්දු – ශ්‍රී ලංකා දෙවැනි ටෙස්ට් තරගයේ ඉල්ලුම ඉහළ යයි ; ප්‍රාන්ත රජයෙන් විශේෂ අවසරයක්
සංචාරක ශ්‍රී ලංකා කණ්ඩායම හා ඉන්දීය කණ්ඩායම අතර පැවැත්වීමට නියමිත දෙවැනි ටෙස්ට් ක්‍රිකට් තරගය නැරඹීම සදහා බැංගලූරුහි එම්. චින්නස්වාමි ක්‍රීඩාංගනයේ ප්‍රේක්ෂක ධාරිතාවයෙන් 100%ක්ම ඇතුළු කර ගැනීමට තීරණය කර තිබෙනවා.
මීට පෙර ක්‍රීඩාංගනයේ ප්‍රේක්ෂක ධාරිතාවයෙන් 50% ක පිරිසකට පමණක් තරගය නැරඹීම සදහා අවස්ථාව ලබා දීමටයි තීරණය කර තිබුණේ.
කර්නාටක ප්‍රාන්ත ක්‍රිකට් සංගමයට ප්‍රාන්ත රජයෙන් ලද අවසරයකට අනුව ක්‍රීඩාංගනයේ ප්‍රේක්ෂක ධාරිතාවයෙන් 100%ක ප්‍රේක්ෂක පිරිසකට තරග නැරඹීමට මෙලෙස අවසර ලබා දී තිබෙනවා.
ප්‍රවේශ පත්‍ර මිලදී ගැනීම සදහා ඉහළ ඉල්ලුමක් ලද බැවින් කර්නාටක ප්‍රාන්ත ක්‍රිකට් සංගමය විසින් මේ සදහා ප්‍රාන්ත රජයෙන් ඉල්ලීමක් සිදු කර තිබූ බව සදහන්.
දෙරට අතර පැවැත්වෙන දෙවැනි හා අවසන් ටෙස්ට් තරගය හෙට(12) දිවා රාත්‍රී තරගයක් ලෙස ආරම්භ වීමට නියමිතයි.
බැංගලූරුහී දී 2018 වසරේ ජූනි මාසයෙන් පසුව ටෙස්ට් තරගයක් පැවැත්වෙන පළමු අවස්ථාව මෙය වන අතර, 2020 වසරේ ජනවාරි මාසයෙන් පසුව එම ක්‍රීඩාංගනයේ දී ජාත්‍යන්තර තරගයක් පැවැත්වෙන පළමු අවස්ථාව මෙය වීම ද විශේෂත්වයක්.