ඉන්දියාව හා කොදෙව්වන් වරද පිළිගනියි ; කණ්ඩායම් දෙකටම දඩ

බටහිර ඉන්දීය කොදෙව් කණ්ඩායමට හා ඉන්දීය කණ්ඩායමට ජගත් ක්‍රිකට් කවුන්සලය විසින් දඩ නියම කර තිබෙනවා.

ඒ, දෙරට අතර ඊයේ(3) පැවැති පළමු පන්දුවාර 20යි 20 ක්‍රිකට් තරගයේ දී කණ්ඩායම් දෙකම පන්දුවාර යවා නිමා කිරීමේ වේගය නියමිත පරිදි පවත්වා නොගැනීම හේතුවෙන්.

ඉන්දියාව නියමිත කාලය නිමා වන විට එක් පන්දුවාරයක් පිටුපසින් සිට ඇති අතර, ඒ අනුව ඔවුන්ට තරග ගාස්තුවෙන් 5% ක දඩ මුදලක් පනවා තිබෙනවා.

කොදෙව්වන් පන්දුවාර දෙකක් පිටුපසින් සිට ඇති අතර, ඒ අනුව කොදෙව් ක්‍රීඩකයින්ට තරග ගාස්තුවෙන් 10% ක දඩ මුදලක් නියම කිරීමටයි අයි.සී.සීය පියවර ගෙන ඇත්තේ.

කොදෙව් නායක රොව්මන් පවෙල් හා ඉන්දීය නායක හර්ඩික් පාන්ඩ්යා මෙම වරද පිළිගෙන ඇති බැවින් මේ සම්බන්ධයෙන් වැඩිදුර විභාගයක් සිදු වන්නේ නැහැ.

පළමු 20යි 20 තරගයෙන් ඉන්දියාව පරදා ලකුණු 4 ක තියුණු ජයක් වාර්තා කළ කොදෙව්වන් තරග 5කින් යුත් තරගාවලිය මේ වන විට තරග 1-0 ක් ලෙස පෙරමුණ ගෙන සිටිනවා.