අවසන් මොහොතේ දී ලෝක කුසලාන ඔස්ට්‍රේලියානු සංචිතයට ප්‍රබල වෙනසක්
ලෝක කුසලාන එක්දින ක්‍රිකට් තරගාවලිය සදහා වන ඔස්ට්‍රේලියානු සංචිතයට මර්නස් ලබුෂේන් ආදේශ කිරිමට පියවර ගෙන තිබෙනවා.
පාදයක ආබාධයකට ලක් වූ ඇෂ්ටන් ඒගාර් වෙනුවටයි ඔහුව සංචිතයට ඇතුළත් කර ඇත්තේ.
කෙසේ වෙතත්, අතක ආබාධයකට ලක්ව සිටින ට්‍රැවිස් හෙඩ් තවදුරටත් ලෝක කුසලාන සංචිතයේ රදවා ගැනීමට පියවර ගෙන තිබෙනවා.
ඒ, ඔහුට ආබාධය හේතුවෙන් ලෝක කුසලාන තරගාවලියේ තරග රැසක් ක්‍රීඩා කිරීමට නොහැකි වන පසුබිමකයි.
එක්දින පිටියේ දී ලබුෂේන්ගේ දක්ෂතා සැලකිය යුතු මට්ටමක නොපැවතුණු බැවින් ඔහුව පළමුව ලෝක කුසලාන සංචිතය සදහා නම් කෙරුණේ නැහැ.
කෙසේ වෙතත්, නිමා වූ දකුණු අප්‍රිකා හා ඉන්දීය සංචාරවලදී ඔහු සුවිශේෂි දක්ෂතා ප්‍රදර්ශනය කළා.
එම සංචාර සදහා ද ඔහුව පළමුව නම් කර නොතිබූ අතර, ස්ටීවන් ස්මිත් ආබාධයකට ලක්වීම හේතුවෙනුයි ඔහුව එම සංචාර සදහා කැදවනු ලැබුවේ.
කෙසේ වෙතත්, දකුණූ අප්‍රිකාවට එරෙහි පළමු එක්දින තරගය සදහා ද ලබුෂේන් ඇතුළත්ව සිටියේ නැහැ. නමුත්, එම තරගයේ දී කැමරන් ග්‍රීන්ගේ හිස් ආවරණයේ පන්දුවක් වැදීමෙන් පසුව ඇති වූ කම්පන තත්ත්වයක් හේතුවෙන් ලබුෂේන් එම තරගය අතරමැදදී කණ්ඩායමට කැදවනු ලැබුවා.
එම තරගයේ දී ඔහු ලකුණු 80 ක් නොදැවී රැස් කරමින් තරගයේ ජය ඔස්ට්‍රේලියාවට හිමි කර දීමට ද සමත් වුණා.
ලෝක කුසලානය සදහා නම් කර ඇති සංචිතවලට අයි.සී.සී අනුමැතියකින් තොරව වෙනස්කම් සිදු කළ හැකි අවසන් දිනය වන්නේ අද දිනයයි.