මුරලිගේ කඩුලු 9ට අදට වසර 22යි

අදට වසර 22 කට පෙර විශිෂ්ඨ පන්දු යැවීමක නිරත වෙමින් ශ්‍රී ලංකාවට ඓතිහාසික ජයග්‍රහනයක් ලබා දීමට ලොව මෙතෙක් බිහි වූ අග්‍රගන්‍යම දග පන්දු පන්දු යවන්නා ලෙස සැලකෙන මුත්තයියා මුරලිදරන් සමත් වුණා.

ඒ, 1998 වසරේ අගෝස්තු 31 වනදා එංගලන්තයේ ඕවල් ක්‍රීඩාංගනයේ දී නිමා වූ එංගලන්තයට එරෙහි ටෙස්ට් තරගයේ දී යි.

මෙම තරගයේ දී ශ්‍රී ලංකාව කඩුලු 10ක ජයක් වාර්තා කළ අතර, එය එංගලන්තයට එරෙහිව ශ්‍රී ලංකාව එරට දී ලැබූ පළමු ටෙස්ට් තරග ජය ද වනවා.

එම තරගයේ දෙවනි ඉනිමේ දී මුරලිදරන් විසින් ලකුණු 65 ක් පමණක් ලබා දී බිඳ හෙලූ කඩුලු සංඛ්‍යාව 9 ක්.

ටෙස්ට් ඉනිමකදී ඔහු කඩුලු 9ක් දවා ගත් පළමු අවස්ථාව එය වූ අතර, අනතුරුව 2002 වසරේ දී සිම්බාබ්වේ කණ්ඩායමට එරෙහිව ද මුරලිදරන් කඩුලු 9ක් දවා ගැනීමට සමත් වුණා.

1998 වසරේ පැවැති එංගලන්තයට එරෙහි ටෙස්ට් තරගයේ පළමු ඉනිමේ දී ද මුරලිදරන් කඩුලු 7ක් දවා ගත්තා.

ඒ අනුව තරගය තුළ දී ඔහු බිඳ හෙලූ සමස්ත කඩුලු සංඛ්‍යාව 16 ක්.

එය අදටත් වාර්තා වන්නේ ජාත්‍යන්තර ටෙස්ට් තරගයක දී පන්දු යවන්නෙකු වාර්තා කර ඇති පස්වන හොඳම පන්දු යැවීමේ දක්ෂතාවය ලෙසයි.

ඔහු හැරුණු විට ශ්‍රී ලංකාව වෙනුවෙන් ටෙස්ට් ඉනිමකදී කඩුලු 9ක් දවා ගත් එකම පන්දු යවන්නා වන්නේ රංගන හේරත්.

මුත්තයියා මුරලිදරන් එංගලන්තයට එරෙහිව කඩුලු 9 ක් දවා ගනිමින් ශ්‍රී ලංකාවට ඓතිහාසික ජයක් අත්කර දුන් අයුරු පහතින් නරඹන්න –

You might also like