පාකිස්තාන සුපර් ලීග් ක්රිකට් තරගාවලියේ 15 වැනි තරගයෙන් පෙෂාවර් සල්මි කණ්ඩායම පරදා ලකුණු 40 ක ජයක් වාර්තා කිරීමට ලාහෝර් කලැන්ඩර්ස් කණ්ඩායම සමත් වුණා.
ලාහෝර්හී දී ඊයේ (26) රාත්රියේ පැවැති මෙම තරගයේ පළමුව පන්දුවට පහරදුන් ලාහෝර් කණ්ඩායම කඩුලු 3 ක් දැවී ලකුණු 241 ක් ලබා ගත්තා.
ඒ, ෆකාර් සමාන් පන්දු 45 කින් රැස් කළ ලකුණු 96 න් හා අබ්දුල්ලාහ් ශෆික් පන්දු 41 කින් වාර්තා කළ ලකුණු 75 න් සවිමත් වෙමින්. සමාන්ගේ ඉනිමට හයේ පහර 10 ක් ඇතුළත්. පන්දු යැවීමේ දී වහබ් රියාස් කඩුලු 2 ක් දවා ගත්තා.
පිළිතුරු ඉනිම ක්රීඩා කළ පෙෂාවර් කණ්ඩායමට පන්දුවාර 20 තුළ කඩුලු 9ක් දැවී ලබා ගත හැකි වූයේ ලකුණු 201 ක් පමණයි.
ටොම් කොහ්ල-කැඩ්මෝර් පන්දු 23 කින් වේගවත් ලකුණු 55 ක් ද, සයිම් අයුබ් පන්දු 34 කින් ලකුණු 51 ක් ද රැස් කළා. භානුක රාජපක්ෂ ලකුණු 24(14) යි.
සුපිරි පන්දු යැවීමක නිරත වූ ශහීන් ශාහ් අෆ්රිඩි ලකුණු 40 කට කඩුලු 5 ක් දවා ගැනීම විශේෂත්වයක්.
ඔහු විසින් යොමු කළ පළමු පන්දුවේ දී මොහමඩ් හැරිස්ගේ පිත්ත කොටස් දෙකකට කැඩී ගිය අතර, දෙවැනි පන්දුවේ දී පන්දුව කෙළින්ම කඩුල්ලේ වැදීමට සලස්වමින් ඔහුගේ කඩුල්ල දවා ගැනීමට අෆ්රිඩි සමත් වුණා. (දර්ශන පහතින්)
First ball: Bat broken ⚡
Second ball: Stumps rattled 🎯PACE IS PACE, YAAR 🔥🔥#HBLPSL8 | #SabSitarayHumaray | #LQvPZ pic.twitter.com/VetxGXVZqY
— PakistanSuperLeague (@thePSLt20) February 26, 2023