අමෙරිකා එක්සත් ජනපදයේ පැවැත්වීමට නියමිත මේජර් ලීග් ක්‍රිකට් (MLC) පන්දුවාර 20යි 20 තරගාවලියට එක්වන MI New York (එම් අයි නිව් යෝර්ක්) කණ්ඩායමේ පන්දු යැවීමේ පුහුණුකරු ලෙස මුම්බායි ඉන්දියන්ස් කණ්ඩායමේ හිටපු සුපිරි වේග පන්දු යවන ක්‍රීඩක ශ්‍රී ලංකාවේ ලසිත් මාලිංග පත් කර තිබෙනවා.
රාජස්ථාන් රෝයල්ස් කණ්ඩායමේ පන්දු යැවීමේ පුහුණුකරු ලෙස මේ වන විට කටයුතු කරන ඔහු ශ්‍රී ලංකා කණ්ඩායමේ ද පන්දු යැවීමේ උපාය මාර්ගික පුහුණුකරුවෙකු ලෙස අවස්ථා කිහිපයකදී කටයුතු කළා.
MI New York කණ්ඩායමේ ප්‍රධාන පුහුණුකරු ලෙස පත් කර ඇත්තේ දකුණු අප්‍රිකා හිටපු ක්‍රිකට් ක්‍රීඩක රොබින් පීටර්සන්. J Arunkumar හා James Pamment පිළිවෙලින් පිතිකරණ හා පන්දු රැකීමේ පුහුණුකරුවන් ලෙස පත් කර තිබෙනවා.
මේ අතර, MI New York කණ්ඩායම සමග රෂීඩ් ඛාන්, ට්‍රෙන්ට් බෝල්ට් හා කාගිසෝ රබාඩා මේ වන විට ගිවිසුම්ගත වී ඇති බවයි එම කණ්ඩායමේ නිවේදනය කළේ.
නිකලස් පූරාන්, ටිම් ඩේවිඩ්, ඩිවාල්ඩ් බ්‍රේවිස් හා ජේසන් බෙහ්රෙන්ඩොර්ෆ් ද MI New York සංචිතයට ඇතුළත්. කයිරන් පොලාඩ් එම කණ්ඩායමේ නායකයා ලෙස කටයුතු කරන අතර, ඩේවිඩ් වීසා ද තුන් ඉරියව් ක්‍රීඩකයෙකු ලෙස සංචිතය ඇතුළත් කර තිබෙනවා.
රෂීඩ් හා රබාඩා මීට පෙර එම් අයි කණ්ඩායම් සමූහයට අයත් MI Cape Town කණ්ඩායම වෙනුවෙන් SA20 තරගාවලියේ දී ක්‍රීඩා කළා.
පූරාන් හා බෝල්ට් ද මීට පෙර ILT20 තරගාවලියේ දී MI Emirates කණ්ඩායම නියෝජනය කළ අතර, ටිම් ඩේවිඩ් හා ඩිවාල්ඩ් බ්‍රේවිස් මීට පෙර IPL හා SA20 තරගාවලියේ දී එම් අයි සමූහයට අයත් කණ්ඩායම් නියෝජනය කළා.
තරගාවලිය ජූලි 13 වැනිදා සිට 30 වැනිදා දක්වා ක්‍රීඩාංගන දෙකකදී පැවැත්වීමට නියමිතයි.