2011 ලෝක කුසලාන එක්දින ක්‍රිකට් තරගාවලියේ අවසන් මහා තරගය පාවා දුන් බවට හිටපු ක්‍රීඩා අමාත්‍ය මහින්දානන්ද අලුත්ගමගේ මහතා කළ චෝදනාව සම්බන්ධයෙන් පරීක්ෂණයක් පවත්වන්නැයි ඉන්දීය රජයෙන් සහ එරට ක්‍රිකට් ආයතනයෙන් තමා ඉල්ලා සිටින බව එවකට සිටි තේරීම් කමිටු ප්‍රධානී අරවින්ද ද සිල්වා මහතා පවසනවා.
හිටපු ක්‍රීඩා අමාත්‍යවරයා ඔහු සතු සාක්ෂි ඉදිරිපත් කළ යුතු බවයි අරවින්ද ද සිල්වා මහතා පෙන්වා දෙන්නේ.
“මම තවදුරටත් නිහඩව ඉන්නේ නෑ. මේක බරපතල චෝදනාවක්. ඔහු ඔහුගේ සාක්ෂි ඉදිරිපත් කළ යුතුයි. ඔහු සතුව තොරතුරු තිබුණේ නම් ඇයි වසර 9ක් නිිහඩව සිටියේ.”
යනුවෙන් අරවින්ද ද සිල්වා ප්‍රශ්න කර සිටිනවා.
හිටපු ක්‍රීඩා අමාත්‍ය මහින්දානන්ද අලුත්ගමගේ මහතා මීට පෙර සදහන් කළේ ලෝක කුසලානය පාවා දීමේ සිද්ධියට තමන් ක්‍රීඩකයින්ට චෝදනා නොකරන බවයි.
ඊට සම්බන්ධ වූයේ ක්‍රිකට් නිළධාරීන් පිරිසක් බවට හිටපු අමාත්‍යවරයා කියා සිටියා.
විශේෂයෙන් අවසන් තරගය සදහා කණ්ඩායම තේරීමේ ක්‍රියාවලිය පිළිබද බරපතල ගැටලු පවතින බවටයි මහින්දානන්ද අලුත්ගමගේ මහතා චෝදනා කර සිටියේ.
කෙසේ වෙතත්, මෙම චෝදනා එවකට සිටි තේරීම් කමිටු ප්‍රධානී අරවින්ද ද සිල්වා මහතා ප්‍රතික්ෂේප කර සිටිනවා.