විදෙස් රටකදී කඩුලු පහක් දවා ගැනීම සදහා දීර්ඝ කාලයක් තිස්සේ තමන් අරමුණු කර ගෙන සිටි බව ශ්‍රී ලංකා දග පන්දු යවන ක්‍රීඩක ප්‍රභාත් ජයසූරිය පවසනවා.
දකුණු අප්‍රිකාව සමග Gqeberha හීදී පැවැත්වෙන දෙවැනි ටෙස්ට් ක්‍රිකට් තරගයේ සිව්වැනි දිනයේදී කඩුලු පහේ අවස්ථාවක් සම්පූර්ණ කරමින් දැක්වූ දක්ෂතා පිළිබද අදහස් දක්වමින් ප්‍රභාත් ඒ බව සදහන් කළේ සිව්වැනි දිනයෙන් පසුව මාධ්‍ය වෙත අදහස් දක්වමින්.
එය ඔහු දවා ගත් 10 වැනි කඩුලු පහේ අවස්ථාව වන අතර, ශ්‍රී ලංකාවෙන් පිටතදී ප්‍රභාත් කඩුලු පහක් දවා ගත් පළමු අවස්ථාව ද එයයි. ඔහු බිද හෙලූ කඩුලු පහේ අවස්ථා 10 න් 8ක්ම බිද හෙලා ඇත්තේ දග පන්දු යවන්නන්ට ඉතා යෝග්‍ය ගාලු තණතීරුව තුළයි.
“පිටරටදී කඩුලු පහේ අවස්ථාවක් කියන්නේ මම කාලයක් තිස්සේ ඉලක්ක කරගෙන හිටපු දෙයක්.” යනුවෙන් ප්‍රභාත් කියා සිටියා.
“ශ්‍රී ලංකාවෙන් පිටතදී කඩුලු ලබා ගැනීම මම විටෙක කනස්සල්ලට පත් වූ දෙයක්. මොකද මට ඒක කරන්න තියෙන හැකියාව ගැන මිනිස්සු ප්‍රශ්න කළා. අපි රටින් පිටත ක්‍රීඩා කරන විට සහ SENA රටවල [දකුණු අප්‍රිකාව, එංගලන්තය, නවසීලන්තය සහ ඕස්ට්‍රේලියාව] ක්‍රීඩා කරන විට, මගේ භූමිකාව හාත්පසින්ම වෙනස්.
“මම නිතරම උත්සාහ කරන්නේ කණ්ඩායම වෙනුවෙන් මට කළ හැකි දේ කිරීමටයි. දකුණු අප්‍රිකාව වැනි ස්ථානයකදී මෙම කඩුලු 5 දවා ගැනීමට හැකිවීම ගැන මම ඉතා සතුටු වෙනවා.”
දෙවැනි ඉනිමේදී ඔහුගේ පන්දු හමුවේ දැවී ගියේ ටෝනි ද සෝර්සි, රයන් රිකල්ටන්, ටෙම්බා බවූමා, ඩේවිඩ් බෙඩින්ග්හැම් හා මාර්කෝ යැන්සන් යන ක්‍රීඩකයින්.