ආබාධයකට ලක් වීම හේතුවෙන් (groin injury) දකුණු අප්‍රිකා වේග පන්දු යවන ක්‍රීඩක ලුන්ගි එන්ගිඩීට ශ්‍රී ලංකාව සමග පැවැත්වීමට නියමිත තරග දෙකකින් යුත් ටෙස්ට් ක්‍රිකට් තරගාවලිය ක්‍රීඩා කිරීමේ අවස්ථාව අහිමි වී තිබෙනවා.
ඔහුට ලබන ජනවාරි මාසය වන තුරු ක්‍රිකට් පිටියෙන් ඉවත්ව සිටීමට සිදු වනු ඇති බවයි එරට ක්‍රිකට් ආයතනය නිවේදනය කළේ.
ශ්‍රී ලංකා තරගාවලියට අමතරව ඔහුට පාකිස්තානයට එරෙහි තරගාවලි ද අහිමි වීමට නියමිතයි.
මේ අතර, නායක ටෙම්බා බවුමා ද ශ්‍රී ලංකාවට එරෙහි පළමු ටෙස්ට් තරගය සදහා ක්‍රීඩා කිරීම අවිනිශ්චිත මට්ටමක පවතිනවා.
වම් වැලමිට ප්‍රදේශයේ ආබාධයකට ලක්ව සුවය ලබමින් සිටින ඔහු එළඹෙන 18 වැනිදා ශාරීරික යෝග්‍යතා පරීක්ෂණයකට මුහුණ දීමට නියමිත අතර, ඉන් අනතුරුව ඔහු සම්බන්ධයෙන් තීරණයක් ගනු ඇති.
බවුමාට පළමු ටෙස්ට් තරගයට ක්‍රීඩා කිරීමට නොහැකි වුවහොත් ඔහු වෙනුවට ඒඩ්න් මාක්‍රම් කණ්ඩායමේ වැඩබලන නායකයා ලෙස කටයුතු කිරීමට නියමිතව තිබෙනවා.
දකුණු අප්‍රිකා – ශ්‍රී ලංකා ටෙස්ට් තරගාවලිය නොවැම්බර් 27 වැනිදා ඩර්බන්හීදී ආරම්භ වීමට නියමිතයි.