හෙට(21) නෙදර්ලන්තයට එරෙහිව පැවැත්වෙන ලෝක කුසලාන තරගය සදහා ද තේරීම් වෙනුවෙන් ශ්‍රී ලංකා වේග පන්දු යවන ක්‍රීඩක මතීෂ පතිරණ සලකා බැලීමට නොහැකි බව ශ්‍රී ලංකා කණ්ඩායමේ සහාය පුහුණුකරු නවීඩ් නවාස් පවසනවා.
තරගය සම්බන්ධයෙන් දැනුවත් කිරීම සදහා අද පැවැති මාධ්‍ය හමුවකදී අදහස් දක්වමින් ඔහු සදහන් කළේ තවත් දින 4ක පමණ කාලයක් ඔහුට පුනරුත්තාපන කටයුතුවල නිරත වීමට සිදු වන බවයි.
ඉන් අනතුරුව ඔහුගේ තත්ත්වය තක්සේරු කර අවශ්‍ය වුවහොත් ඔහු වෙනුවට වෙනත් ක්‍රීඩකයෙකු සංචිතයට ආදේශ කරන බව හෙතෙම කියා සිටියා.
අවශ්‍යතාවයක් ඇති වුවහොත් සංචිතයට කැදවීමේ අරමුණින් දුෂ්මන්ත චමීර හා ඇන්ජෙලෝ මැතිව්ස් ද අතිරේක ක්‍රීඩකයින් ලෙස තරගාවලිය වෙනුවෙන් නම් කිරීමට ශ්‍රී ලංකා ක්‍රිකට් තේරීම් කමිටුව පියවර ගත් අතර, ඒ අනුව ඔවුන් දෙදෙනා අද දිනයේ දී ලක්නව්හී දී ශ්‍රී ලංකා කණ්ඩායම සමග එක් වුණා.
පතිරණට තරගාවලියෙන් ඉවත් වීමට සිදු වුවහොත් ඔහු වෙනුවට බොහෝ විට චමීර සංචිතයට ආදේශ කිරීමට පියවර ගනු ඇති.
මේ අතර, ඔස්ට්‍රේලියාව සමග පැවැති තරගයේ දී පන්දුවක් හිස් ආවරණයේ වැදීමෙන් කම්පන තත්ත්වයකට මුහුණ දුන් කුසල් පෙරේරා මේ වන විට යථා තත්ත්වයට පත් වෙමින් සිටින බව ද සහාය පුහුණුකරු නවීඩ් නවාස් සදහන් කළා.
කුසල් ඊයේ දිනයේ දී පුහුණුවීම්වල නිරත වූ බවත්, අද දිනයේ දී ද පුහුණුවීම්වල නිරත වන බවත් ඔහු කියා සිටියා. අද පැවැත්වෙන පුහුණුවීම්වලින් අනතුරුව ඔහුට හෙට තරගයට ක්‍රීඩා කළ හැකි දැයි අවසන් වශයෙන් තීරණය කරන බවයි සහාය පුහුණුකරු මාධ්‍ය හමුවේ පැවසුවේ.
මෙවර ලෝක කුසලාන ක්‍රිකට් තරගාවලියේ 19 වැනි තරගය ශ්‍රී ලංකාව හා නෙදර්ලන්තය අතර හෙට ලක්නව් හී දී පෙරවරු 10:30 ට ආරම්භ වීමට නියමිතයි.