සංචාරක ඔස්ට්‍රේලියානු කණ්ඩායම හා ශ්‍රී ලංකා කණ්ඩායම අතර පැවැත්වෙන දෙවැනි හා අවසන් ටෙස්ට් ක්‍රිකට් තරගයේ දෙවැනි දිනය අද (9) නිමා වුණේ දිනයේ වැඩි ගෞරව ශ්‍රී ලංකාවට හිමි කර දෙමින්.
දිනය නිමා වන විට සිය පළමු ඉනිම ක්‍රීඩා කරමින් සිටි ශ්‍රී ලංකාව කඩුලු 2 ක් දැවී ලකුණු 184 ක් ලබා සිටියා.
ඉනිමේ පළමු කඩුල්ල ලෙස පැතුම් නිස්සංක ලකුණු 6ක් ලබා සිටියදී දැවී ගියේ මිචෙල් ස්ටක් යොමු කළ පන්දුවක් හමුවේ කැමරන් ග්‍රීන් අතට උඩ පන්දුවක් ලබා දෙමින්.
අනතුරුව දෙවැනි කඩුල්ල සදහා නායක දිමුත් කරුණාරත්න හා කුසල් මෙන්ඩිස් අතර ගොඩ නැගුණු සබදතාවය ලකුණු 152 ක්.
සිය 30 වැනි ටෙස්ට් අර්ධ ශතකය වාර්තා කළ දිමුත් ලකුණු 86කට දැවී ගියේ මිචෙල් ස්වෙප්සන්ගේ පන්දුවක් හමුවේ කඩුල්ල මුවා කිරීමේ වරදට හසු වෙමින්. කුසල් අද වාර්තා කළේ සිය 14 වැනි ටෙස්ට් අර්ධ ශතකයයි. ඔහු නොදැවී ලකුණු 84 ක් ලබා කඩුල්ලේ රැඳී සිටිනවා.
ඇන්ජෙලෝ මැතිව්ස් නොදැවී ලකුණු හයයි.
ගාල්ලේ දී පැවැත්වෙන තරගය අද දිනය සදහා ආරම්භ කරන විට තරගයේ කාසියේ වාසිය දිනා පළමුවෙන් පන්දුවට පහර දෙමින් සිටි ඔස්ට්‍රේලියානු කණ්ඩායම කඩුලු 5ක් දැවී ලබා සිටි ලකුණු සංඛ්‍යාව 298ක්. ඔවුන්ගේ සියලු පිතිකරුවන් ලකුණු 364ක් ලෙස සටහන්ව තිබියදී දැවී ගියා.
සිය 28 වැනි ටෙස්ට් ශතකය වාර්තා කළ ස්ටීවන් ස්මිත් නොදැවී ලකුණු 145 යි. ඔහුගේ ඉනිමට හතරේ පහර 16ක් ඇතුළත්.
දිනයේ පළමු කඩුල්ල ලෙස ලකුණු 28ක් ලබා සිටි ඇලෙක්ස් කෙරී දැවී ගියා. අනතුරුව මිචෙල් ස්ටක් එක් ලකුණකට දැවී ගියේ මෙම තරගයේ දී ටෙස්ට් වරම් දිනූ ප්‍රභාත් ජයසූරියට සිය මංගල කඩුලු පහේ අවස්ථාව සනිටුහන් කිරීමට අවස්ථාව සළස්වමින්.
පැට් කමින්ස් ලකුණු 5කටත්, නේදන් ලයන් ලකුණු 5කටත්, මිචෙල් ස්වෙප්සන් ලකුණු 3 කටත් දැවී ගියා. ස්වෙප්සන් දැවී ගියේ මහීෂ් තීක්ෂණගේ මංගල ටෙස්ට් කඩුල්ල බවට පත් වෙමින්.
ඔස්ට්‍රේලියානු ඉනිම වෙනුවෙන් මර්නස් ලබුෂේන් ලකුණු 104 ක් වාර්තා කළා. එය ඔහු සිය රටින් පිටතදී වාර්තා කළ පළමු ශතකයයි. උස්මාන් කවාජා ලකුණු 37 යි.
පන්දු යැවීමේ දී ප්‍රභාත් ජයසූරිය ලකුණු 118කට කඩුලු 6ක් දවා ගත්තා. කසුන් රාජිත කඩුලු 2ක් බිද හෙලූ අතර, රමේෂ් මෙන්ඩිස් හා මහීෂ් තීක්ෂණ අතරේ එක් කඩුල්ල බැගින් බෙදී ගියා.
ඒ අනුව ශ්‍රී ලංකාව මේ වන විට පළමු ඉනිමේ දී පිටුපසින් පසුවන ලකුණු සංඛ්‍යාව 180 ක්.