පාකිස්තානය සමග මෙවර ලෝක කුසලාන එක්දින ක්‍රිකට් තරගාවලිය යටතේ හෙට(10) පැවැත්වීමට නියමිත තරගය සදහා ක්‍රීඩා කිරීමට ශ්‍රී ලංකා දග පන්දු යවන ක්‍රීඩක මහීෂ් තීක්ෂණ සුදුසු යෝග්‍යතාවයකින් පසුවන බව ශ්‍රී ලංකා කණ්ඩායමේ සහාය පුහුණුකරු නවීඩ් නවාස් පවසනවා.
හෙට තරගය සම්බන්ධයෙන් දැනුවත් කිරීම සදහා අද පැවැති මාධ්‍ය හමුවකදී අදහස් දක්වමින් ඔහු ඒ බව සදහන් කළා.
ආසියානු කුසලාන තරගාවලියේ දී මුහුණ දුන් පාදයක ආබාධයෙන් පසුව 100% ක යෝග්‍යතාවයකින් පසු නොවීම හේතුවෙන් තීක්ෂණට දකුණු අප්‍රිකාව සමග පසුගිය 7 වැනිදා පැවැති තරගයට ක්‍රීඩා කිරීමට හැකි වූයේ නැහැ.
එම තරගයෙන් ශ්‍රී ලංකාව ලකුණු 102 කින් පරාජයට පත් වුණා.
ලෝක කුසලාන ක්‍රිකට් තරගාවලිය යටතේ ශ්‍රී ලංකාව ක්‍රීඩා කරන දෙවැනි තරගය හෙට පාකිස්තානයට එරෙහිව පැවැත්වෙන්නේ හයිදරාබාද් හී දී යි. තරගය පස්වරු දෙකට ආරම්භ වීමට නියමිතයි.