බංග්ලාදේශ කඩුලු රකින ක්‍රීඩක මුෂ්ෆිකර් රහීම්ට ඇෆ්ඝනිස්තානය සමග පැවැත්වෙන තරග 3කින් යුත් එක්දින ක්‍රිකට් තරගාවලියේ අවසන් තරග දෙක ක්‍රීඩා කිරීමේ අවස්ථාව අහිමි වී තිබෙනවා.
ඒ, ඔහු දෙරට අතර සාජාහී දී පැවැති පළමු එක්දින තරගයේ දී ඇගිල්ක ආබාධයකට මුහුණ දීම හේතුවෙන්.
එම තරගයේදී කඩුලු රකිමින් සිටියදී ඔහුගේ වම් අතේ ඇගිල්ලක මෙම ආබාධය සිදුව ඇති බව සදහන්.
තරගයෙන් අනතුරුව මුහුණ දුන් වෛද්‍ය පරීක්ෂණවලදී අනාවරණය වී ඇත්තේ ඔහුගේ වම් අතෙහි ඇගිල්ලක අස්ථි බිදී යාමක් සිදුව ඇති බවයි.
ආබාධය හේතුවෙන් ඔහු බංග්ලාදේශ ඉනිමේ අංක 7 පිතිකරු ලෙස පිටියට පිවිසි නමුත්, ඔහුට ලබා ගැනීමට හැකි වූයේ එක් ලකුණක් පමණයි.
පළමු එක්දින තරගයෙන් බංග්ලාදේශය ලකුණු 92 ක පරාජයක් ලැබූ අතර, දෙවැනි එක්දින තරගය එඹෙන 9 වැනිදා පැවැත්වීමට නියමිතයි.